Eronda Rossiyaning “Sputnik V” vaksinasi bilan emlash 9-fevral kuni boshlanadi. “Interfaks”ning xabar berishicha, bu haqda mamlakat sog‘liqni saqlash vaziri Seyid Namaki ma’lum qildi.
Uning ta’kidlashicha, birinchi navbatda intensiv terapiya bo‘limi tibbiyot xodimlari emlanadi.
IRNA agentligining ma’lum qilishicha, eng ishonchli vaksinalar tekshiruvidan so‘ng, Eron eng xavfsiz preparatlardan birini tanlab, import qilgan.
“Sputnik V” vaksinasining birinchi partiyasi ortilgan samolyot 4-fevral kuni Tehronga yetib kelgan. Mamlakatga, shuningdek, fevral oyida 4,2 million doza AstraZeneca vaksinasi yetkazib berilishi kutilmoqda.
Dekabr oyida Eron o‘zining Razi Cov Pars vaksinasini klinik sinovlaridan o‘tkazishni boshlagan. Eron prezidenti Hasan Ruhoniyning aytishicha, ushbu preparat yozning boshlarida foydalanishga topshirilishi mumkin.
Jons Hopkins ma’lumotlariga ko‘ra, Eronda pandemiya boshlanganidan beri 1,4 milliondan ortiq koronavirusga chalinish holatlari aniqlangan, bemorlarning 58,4 mingdan ortig‘i vafot etgan.
Eslatib o‘tamiz, Eron yanvar oyining oxirida Rossiyaning “Sputnik V” vaksinasini ro‘yxatdan o‘tkazgan.
Izoh (0)