6 февраль куни Франция, Швейцария, Андорра ва бошқа Европа мамлакатларида камёб метеорологик ҳодиса кузатилди — шаҳарларда осмон сариқ тус олди, тоғ-чанғи курортларидаги қор эса жигарранг тусга кирди, деб ёзади Meduza.
Бу сирокко (гармсел) деб номланувчи иссиқ шамол туфайли юз берди, у ўзи билан Саҳрои Кабирдан кўп миқдорда майда қум ва чанг олиб келди.
Қумнинг ҳаводаги зичлиги юқори бўлса, кўриниш даражаси ёмонлашади. Саҳро Кабирдан келган чанг нафақат осмонда, балки, ерда ҳам ўз «изини» қолдирди. Микрозарралар юзаларга келиб қўнмоқда.
Саҳрои Кабир чангининг ижобий томони ҳам бор. Ундаги кўплаб озуқавий моддалар ўсимликлар учун ўғит ҳисобланади. Масалан, тадқиқотлардан бирида айтилишича, дунёдаги энг йирик саҳродан келган микрозарралар Амазонка минтақасида флоранинг хилма-хиллиги учун жуда муҳимдир. Пассатлар (тропиклардан экваторга томон доим эсиб турадиган қуруқ шамол) чангни Африкадан Атлантика океани орқали Жанубий Америкага олиб келади, ва Амазонка минтақасининг ўзида йилига тонналаб Африкадан келган чанглар ўтириб қолади.
Эслатиб ўтамиз, январь ўрталарида Саҳрои Кабирда ҳаво ҳарорати нолдан пасайиб кетганидан кейин кутилмаганда қор ёғган эди.
Куни кеча эса Германия ва Нидерландия кучли қор сабаб транспорт ҳаракатини тўхтатиб қўйди.
Изоҳ (0)