7-fevral kuni Germaniya hukumati kuchli qor yog‘ishi tufayli Niderlandiya bilan o‘ta tezyurar Intercity (ICE) poyezdlar qatnovini bekor qilishga majbur bo‘ldi, deb yozadi “RBK”.
Poyezdlar harakatini to‘xtatishdan tashqari, qor yog‘ishi yana bir qancha hodisalarga ham sababchi bo‘ldi. Shimoliy Reyn-Vestfaliya shtatining o‘zida noqulay ob-havo tufayli 222 ta yo‘l-transport hodisasi yuz berdi. Ularda 28 kishi jabrlandi. OAVlarga ko‘ra, hodisalar oqibatida yetgan zarar taxminan 1 million yevroga baholanmoqda.
Noqulay ob-havo 7-fevral, yakshanba kuni o‘tkazilishi kerak bo‘lgan Bundesliga va Ikkinchi Bundesliganing bir qator musobaqalari bekor qilinishiga ham sababchi bo‘ldi.
Kuchli qor yog‘ishi va qor bo‘ronlari 7-fevral kuni Niderlandiyada ham transport harakatini to‘xtatib qo‘ydi — aeroportlarda reyslar bekor qilindi, poyezdlar harakati to‘xtadi, jamoat transporti harakatida jiddiy muammolar kuzatilmoqda. Transport harakati qachon qayta tiklanishi aniq emas.
Niderlandiya meteorologiya xizmati xabar berishicha, 7-fevralga o‘tar kechasi yog‘gan kuchli qor o‘n yil ichida birinchi marta kuzatilgan. So‘nggi marta bunday holat 2010-yil yanvarida kuzatilgan. Meteoxizmat butun mamlakat hududida qizil (maksimal) trevogani e’lon qildi. Ma’lum qilinishicha, qahratonda shamol tezligi soatiga 90 kilometrga yetishi mumkin.
Niderlandiya hududining katta qismida 5—10 sm, ba’zi joylarda esa 30 sm qalinlikda qor yog‘gan. NS temir yo‘l operatorining xabar qilishicha, Niderlandiyada poyezdlar kamida 8-fevral, dushanba kuni tushgacha bekor qilingan.
Ayni paytda sovuq front Buyuk Britaniyaga qarab yo‘l olmoqda, mamlakat noqulay ob-havoga tayyorlanmoqda.
Izoh (0)