Fors ko‘rfazining boshqa nomidan foydalangani uchun, Tehron Rossiya Tashqi ishlar vazirligiga norozilik bildirdi. Bu haqda Eron Tashqi ishlar vazirligi rasmiy vakili Said Xatibzoda ma’lum qildi, deb yozadi “RBK”.
Uning aytishicha, Eron Rossiyadagi elchixonasi orqali Rossiya TIVga norozilik notasini yuborgan.
Xatibzodaning aniqlik kiritishicha, gap Rossiya TIVning Twitter’dagi rasmiy akkauntining arabcha versiyasida e’lon qilingan tvit haqida bormoqda, unda ko‘rfazning “feyk” nomi qo‘llanilgan.
Rossiya TIVning Twitter’dagi xabarida Rossiya prezidentining Yaqin Sharq va Afrika mamlakatlari bo‘yicha maxsus vakili, tashqi ishlar vaziri o‘rinbosari Mixail Bogdanov Iroq elchisi Abdurahmon Husayniy bilan uchrashgani haqida aytiladi. Tomonlar mintaqaviy kun tartibining asosiy jihatlarini, shu jumladan, Falastin—Isroil munosabatlarini tartibga solish, Suriyadagi va Fors ko‘rfazi hududidagi vaziyatni muhokama qilgan. Tvitga yozilgan izohlardan ma’lum bo‘lishicha, xabarda dastlab “Arab ko‘rfazi” deb yozilgan, keyinroq “Fors ko‘rfazi” deb o‘zgartirilgan.
Eron “Arab ko‘rfazi” deb yozilishiga qarshi chiqadi. Fors — ko‘rfazning an’anaviy geografik nomlanishi. U zamonaviy Eron joylashgan hududni o‘z ichiga olgan qadimiy Fors davlati sharafiga nomlangan. Misr sobiq prezidenti Hamal Abdul Nosir va Iroq sobiq prezidenti Saddam Husayn uni Arab ko‘rfazi deb qayta nomlashga uringan, chunki, ularning fikricha, ko‘rfaz barcha arab mamlakatlariga tegishli.
2006-yilda Eron hukumati mamlakatda Britaniyaning Economist jurnali sotilishini taqiqlab qo‘ygan, bunga nashrning so‘nggi sonidagi geografik xaritada Fors ko‘rfazi “Ko‘rfaz” deb atalgani sabab bo‘lgan edi.
2004-yilda esa Eronda National Geographic atlasining yangi nashri taqiqlangan edi. O‘shanda xaritada “Fors ko‘rfazi” an’anaviy nomlanishi yonida qavs ichida “Arab ko‘rfazi” deb yozib qo‘yilgan edi.
Izoh (0)