Қирғизистоннинг биринчи президенти Асқар Акаев ва унинг оиласи тўнғич ўғли Айдар Акаевнинг вафотига бир йил тўлиши муносабати билан унинг қабрини зиёрат қилди. Қабр устига қабртош ўрнатилди, деб ёзмоқда Kloop.
Айдар Акаев отаси ҳукмронлиги даврида молия вазири маслаҳатчиси бўлиб ишлаган ва парламент аъзоси бўлган. Бироқ 2005 йилги инқилоб ва Асқар Акаевнинг ҳокимиятдан ағдарилишидан сўнг, у ҳукуматдаги лавозим ва барча ваколатларидан маҳрум қилинган.
Ўшанда Бош прокуратура унга қарши давлат маблағларини талон-торож қилиш, молиявий фирибгарлик ва ўзгаларнинг мол-мулкини ноқонуний ўзлаштирганлик айблови билан жиноий иш қўзғатган эди.
Асқар Акаев инқилобдан кейин рафиқаси ва болалари билан Москвага жўнаб кетганди, тўнғич ўғли у ерда тадбиркорлик билан шуғулланган. Россияда у Москва ғарбидаги элита ҳудуд— «Рубльёвка»да яшаган.
2020 йил 6 февраль куни Айдар Акаевнинг вафот этгани маълум бўлган. Россия ОАВлари «Рубльёвка»даги уйдан Акаевнинг жасади топилгани ҳақида хабар тарқатган. Кейинчалик оилавий адвокати Икромиддин Айтқуловнинг айтишича, Айдар Акаев 44 ёшга тўлишидан атиги икки ҳафта олдин юрак хасталиги сабабли вафот этган.
Аввалроқ Қирғизистон Миллий хавфсизлик хизмати раҳбари Камчибек Ташиев даволаниш учун хорижга кетаётганини маълум қилганди. Амалдорда юрак билан боғлиқ муаммолар кузатилган.
Эслатиб ўтамиз, 2021 йил 3 февралда Қирғизистон парламенти 41 ёшли Улуғбек Марипов номзодини бош вазир лавозимига тасдиқлаган. Улуғбек Марипов бош вазирлик курсисига ўтирганидан кейин ўзининг қондош укаси Бахитбек Мариповни Ўш вилоятининг Новқат тумани ҳокимлиги лавозимидан четлатган.
Изоҳ (0)