«Ўқишнинг бошланиши, мамлакат ҳудудига кириш учун асос бўла олмайди». Ўзбекистон ТИВ Россия ОТМларида таҳсил оладиган талабаларга огоҳлантириш билан чиқди

Ўзбекистон Ташқи ишлар вазирлиги Россиядаги олий таълим муассасаларида таҳсил олаётган талабаларга огоҳлантириш билан чиқди.

Маълум қилинишича, Россия Таълим ва илм-фан вазирининг буйруғи билан 8 февралдан бошлаб ушбу вазирлик ҳузуридаги олий ўқув юртларида кундузги ўқиш жараёни бошлаш кўзда тутилган. Шу сабабли «Россияга қайтиш истагида бўлган ўзбекистонлик талабаларнинг турли сохта ҳужжатлар, шу жумладан, чегарани кесиб ўтишда ёрдам бериш учун Россия олий ўқув юртлари номидан сохта таклиф хатлари тайёрлашга ихтисослашган шубҳали шахсларга мурожаат қилиш ҳолатлари учрамоқда».

Бундан ташқари, идора маълумотларига кўра, ижтимоий тармоқлар ва мессенжерларда Ўзбекистондан Россияга чартер рейсига талабалар рўйхати тузилаётгани ҳақидаги маълумотлар тарқалган.

«Бу Россия ҳукуматининг хорижий фуқаролари ва фуқаролиги йўқ шахсларнинг мамлакат ҳудудига киришини вақтинча чеклаш тўғрисидаги қарори талабларига зид. Ҳозирги вақтда Россия олий ўқув юртларида таҳсил олаётган ўзбекистонлик талабалар Россия ҳудудига тўсқинликларсиз кириш ҳуқуқига эга фуқаролар таснифига кирмайди», — дейилади хабарда.

Шундай қилиб, Россия халқаро аэропортларига чартер рейслари билан келган Ўзбекистон фуқаролари чегарани кесиб ўтишда ва тасдиқловчи ҳужжатлар юзасидан муаммоларга дуч келиши мумкин.

Юқоридагиларни инобатга олган ҳолда, Ўзбекистон ТИВ шубҳали шахсларнинг таъсирига тушиб қолмаслик ва алданиб қолмаслик, Россия ҳудудига киришда рад жавоби олмаслик учун ҳамда чартер рейслари ташкилотчилари ва авиаташувчилар билан суд жараёнларининг олдини олиш мақсадида, олий ўқув юртлари халқаро бўлимлари билан доимий равишда алоқада бўлиб туриш ва чегаралар очилгунга қадар масофавий таълимни давом эттиришни сўрайди.

Аввалроқ ўзбекистонлик талабалар учун Россия ОТМларидаги квоталар сони кўпайтирилиши тўғрисида хабар берилганди.