O‘zbekistonning ona sutining o‘rnini bosuvchi mahsulotlar bozori import nuqtayi nazaridan MDH davlatlari orasida eng istiqbollisidir. Spot’ning xabar berishicha, bu haqda Rossiya Qishloq xo‘jaligi vazirligi Agrosanoat kompleksi mahsulotlari eksportini rivojlantirish federal markazi rahbari Dmitriy Krasnov ma’lum qildi.
“Respublika MDH mamlakatlari orasida ona sutining o‘rnini bosuvchi mahsulotlarning eng yirik iste’molchisi hisoblanadi. 4 ming tonnadan ortiq hajmdagi barcha iste’mol qilinadigan mahsulotlar import qilinadi. Ular orasida Rossiyada tayyorlangan aralashmalarning ulushi import qilinadigan mahsulotlarning 42 foizini tashkil qiladi”, — degan u.
Tahlilchining ta’kidlashicha, O‘zbekistonda ushbu mahsulot bozori tug‘ilish darajasining yuqoriligi, ishlaydigan ayollar sonining ortgani va aholi daromadlarining ko‘payishi hisobiga faol o‘sib bormoqda:
Aholining o‘rtacha yillik o‘sishi 5 yil ichida 2 foizni tashkil etgan. Aholi sonining tez o‘sishiga qaramay, aholi jon boshiga o‘rtacha daromad ham o‘sib bormoqda.
“Shu sababli biz uchun birinchi bosqichda — sut aralashmalarini yetkazib berish. Ammo O‘zbekiston hududida quritilgan mahsulotlarni yig‘ish bo‘yicha tegishli ishlab chiqarish korxonalarini ochish ham import qilish jihatidan istiqbollidir. Qolaversa, mamlakatda bu borada mahalliy ishlab chiqaruvchilar yo‘q”, — deb qo‘shimcha qilgan Dmitriy Krasnov.
2019-yildan boshlab O‘zbekistonda ona sutining o‘rnini bosuvchi mahsulotlarni reklama qilishga taqiq o‘rnatilgan. Ona sutining o‘rnini bosuvchi mahsulot to‘g‘risidagi har qanday axborot ona sutining foydasi va afzalligi to‘g‘risidagi ko‘rsatmani o‘z ichiga olgan bo‘lishi kerak.
Izoh (0)