Viloyat hokimligida Panjob viloyati gubernatori Muhammad Sarvar boshchiligidagi Pokiston delegatsiyasining rasmiy qabuli bo‘lib o‘tdi. Bu haqda “Daryo” muxbiri Azizbek Abduvaliyev xabar berdi.
Viloyat hokimi Shavkatjon Abdurazzaqov Panjob viloyati gubernatori Muhammad Sarvarni Namanganga kelgani bilan samimiy qutladi va ushbu tashrif Namangan delegatsiyasining 2019-yilda Pokistonga safariga amaliy javob bo‘lganini ta’kidladi.
“Pokistonning eng yirik viloyati bo‘lgan Panjob va Namangan o‘rtasidagi aloqalarni mustahkamlash biz uchun muhim ahamiyatga ega. Shuni alohida ta’kidlab o‘tmoqchimanki, Namangan va Panjob viloyatlari o‘rtasidagi hamkorlik strategiyasi va muayyan yo‘nalishlarini ishlab chiqish bo‘yicha maxsus ishchi guruhi tashkil etildi. Bu guruhga shaxsan o‘zim rahbarlik qilaman”, — dedi Shavkatjon Abdurazzaqov.
Uchrashuv yakunida Namangan viloyati hokimligi va Panjob viloyati hukumati o‘rtasidagi savdo-iqtisodiy, investitsiya, madaniy-gumanitar, ilmiy-texnikaviy va turizm sohalaridagi o‘zaro hamkorlik to‘g‘risida memorandum imzolandi.
Mintaqalararo hamkorlikning amaliy ahamiyati va salohiyatini inobatga olib, Namangan va Panjob viloyatlari “Birodarlashgan hududlar” deya e’lon qilindi.
Izoh (0)