Toshkentning Ahmad Donish ko‘chasidagi ko‘prikning bir tomoni ta’mirlash ishlari sabab 13-fevralga qadar yopiladi

Toshkentning Yunusobod tumanida Amir Temur shoh ko‘chasi ustidan o‘tgan ko‘prikning bir tomoni ta’mirlash ishlari sabab vaqtincha yopiladi. Bu haqda poytaxt hokimligi matbuot xizmati xabar berdi.

“Amir Temur shoh ko‘chasi ustidan o‘tgan ko‘prikning bir tomoni ‘Yunusobod’ metro bekatidan 7-son shahar klinik shifoxonasi yo‘nalishida transport harakati uchun vaqtincha yopiladi”, — deyiladi xabarda.

Ta’kidlanishicha, bu ta’mirlash ishlarini tezroq yakunlash maqsadida amalga oshirilmoqda.

Ishlar 13-fevral kuni yakunlanishi rejalashtirilgan.

Hokimlik vujudga kelishi mumkin bo‘lgan tirbandliklarning oldini olish maqsadida haydovchilarga aylanma yo‘llardan foydalanishni tavsiya etgan.

Avvalroq mazkur ko‘prikning bir tomonidagi ta’mirlash ishlari yakunlanib, yo‘lning yopilgan qismi transportlar harakati uchun ochilgani to‘g‘risida xabar berilgandi.