Ўзбекистоннинг она сутининг ўрнини босувчи маҳсулотлар бозори импорт нуқтаи назаридан МДҲ давлатлари орасида энг истиқболлисидир. Spot’нинг хабар беришича, бу ҳақда Россия Қишлоқ хўжалиги вазирлиги Агросаноат комплекси маҳсулотлари экспортини ривожлантириш федерал маркази раҳбари Дмитрий Краснов маълум қилди.
«Республика МДҲ мамлакатлари орасида она сутининг ўрнини босувчи маҳсулотларнинг энг йирик истеъмолчиси ҳисобланади. 4 минг тоннадан ортиқ ҳажмдаги барча истеъмол қилинадиган маҳсулотлар импорт қилинади. Улар орасида Россияда тайёрланган аралашмаларнинг улуши импорт қилинадиган маҳсулотларнинг 42 фоизини ташкил қилади», — деган у.
Таҳлилчининг таъкидлашича, Ўзбекистонда ушбу маҳсулот бозори туғилиш даражасининг юқорилиги, ишлайдиган аёллар сонининг ортгани ва аҳоли даромадларининг кўпайиши ҳисобига фаол ўсиб бормоқда:
Аҳолининг ўртача йиллик ўсиши 5 йил ичида 2 фоизни ташкил этган. Аҳоли сонининг тез ўсишига қарамай, аҳоли жон бошига ўртача даромад ҳам ўсиб бормоқда.
«Шу сабабли биз учун биринчи босқичда — сут аралашмаларини етказиб бериш. Аммо Ўзбекистон ҳудудида қуритилган маҳсулотларни йиғиш бўйича тегишли ишлаб чиқариш корхоналарини очиш ҳам импорт қилиш жиҳатидан истиқболлидир. Қолаверса, мамлакатда бу борада маҳаллий ишлаб чиқарувчилар йўқ», — деб қўшимча қилган Дмитрий Краснов.
2019 йилдан бошлаб Ўзбекистонда она сутининг ўрнини босувчи маҳсулотларни реклама қилишга тақиқ ўрнатилган. Она сутининг ўрнини босувчи маҳсулот тўғрисидаги ҳар қандай ахборот она сутининг фойдаси ва афзаллиги тўғрисидаги кўрсатмани ўз ичига олган бўлиши керак.
Изоҳ (0)