Andijon viloyatining Asaka tumanida MAN yuk avtomobili yo‘lni kesib o‘tayotgan yo‘lovchini urib ketdi. Yo‘lovchi esa voqea joyida vafot etdi, deya xabar berdi “Daryo” muxbiri Umidjon Mamarasulov.
Andijon viloyat IIB, Yo‘l harakati xavfsizligi boshqarmasi matbuot guruhi inspektori Doniyor Aliyevning ma’lumot berishicha, 2021-yil 5-fevral kuni soat 14-30 da Asaka tumani “Beruniy” mahallasi, Imom Buxoriy ko‘chasi hududidan o‘tuvchi davlat ahamiyatiga ega 4R-1121 Farg‘ona halqa yo‘li avtomobil yo‘lining 164-kilometrida YTH sodir bo‘lgan.
YTHda Farg‘ona viloyati, O‘zbekiston tumanida yashovchi “Angren Avtonefttrans” MChJda haydovchi bo‘lib ishlovchi fuqaro MAN rusumli yuk avtomashinasini boshqarib ketayotgan vaqtda o‘sha yerdagi svetoforning taqiqlovchi ishorasiga amal qilib, chorrahada turgan vaqtida 83 yoshli fuqaro avtomashinaning o‘ng tomonidan kelib yo‘lni kesib o‘tayotganida urib yuborgan. Oqibatda piyoda boshi va qorin qismidan og‘ir tan jarohati olib, voqea joyida vafot etgan. Ta’kidlanishicha, yuk avtomashinasi harakatlangan vaqtda piyoda haydovchiga ko‘rinmagan.
Mazkur holat yuzasidan Asaka tumani IIB tomonidan dastlabki tergov-surishtiruv ishlari olib borilmoqda.
Qo‘shimcha qilinishicha, YTHdan keyin viloyat Ichki ishlar bo‘limi Yo‘l harakati xavfsizligi boshqarmasi boshlig‘i Saidolim Zingirov boshchiligida avtohalokat tafsilotlari o‘rganilib, hodisaning sabab va oqibatlari jamoatchilik vakillari bilan birgalikda muhokama qilingan.
Eslatib o‘tamiz, avvalroq Andijonda Cobalt urib ketgan velosiped haydovchisi shifoxonada vafot etgani haqida xabar berilgandi.
Izoh (0)