Subaru kompaniyasi AQShda ishlab chiqarilgan 2021-model yiliga oid 383 nusxa Outback va Impreza’ni chaqirib oladi. Aniqlanishicha, avtozavod xodimi variatorni yig‘ish vaqtida gaykalarni noto‘g‘ri qotirgan, deb xabar beradi Motor.
Chaqirib olinadigan avtomobillar qatoridan 2020-yilning 14—21-dekabr oralig‘ida AQShda yig‘ilgan 314 nusxa Outback hamda 69 ta Impreza o‘rin olgan. Ichki tekshiruv natijasida ma’lum bo‘lishicha, Subaru vakillari korxona xodimlaridan biri o‘zgaruvchan transmissiyani yig‘ishda selektor trosini tortadigan gaykani qotiradigan kuchlanishni tanlashda xatolikka yo‘l qo‘ygan.
Mutaxassisning qilgan xatosi sabab yuqorida nomlari keltirilgan avtomobillarning uzatmalar selektori noto‘g‘ri ishlay boshlashi mumkin. Variatorning (yuritma bilan ish bajaruvchi mexanizm orasidagi uzatish nisbatini bir tekis o‘zgartiradigan qurilma) bu kabi nosozligi harakat vaqtida jiddiy oqibatlarni yuzaga keltirishi mumkin. Yapon kompaniyasi vakillarining so‘zlariga ko‘ra, xatolikka yo‘l qo‘ygan xodim 91 ta modelni yig‘ishda ishtirok etishga ulgurgan. Biroq har ehtimolga qarshi avtomobil ishlab chiqaruvchilar ushbu xodimning qo‘li tekkan bo‘lishi mumkin bo‘lgan barcha avtomobillarni chaqirib olishga qaror qilgan.
Subaru egalari 2021-yil 19-fevralga qadar mazkur nosozlik bo‘yicha xabardor qilinadi. Ayni vaqtida korxona xodimining xatoligi sabab yuzaga kelgan biror-bir avariya haqida ma’lumotlar kelib tushmagan.
Eslatib o‘tamiz, 2020-yilning oktabrida Angliya va Uelsdan Fiat-Chrysler Automobiles (FCA) dizel dvigatellari o‘rnatilgan 500 mingga yaqin avtomobil chaqirib olinishi mumkinligi to‘g‘risida xabar berilgandi. Bunga atrof-muhitga chiqariladigan zararli gazlar ko‘rsatkichi manipulyatsiya qilingan bo‘lishi ehtimolligi sabab bo‘lgan.
Izoh (0)