Subaru компанияси АҚШда ишлаб чиқарилган 2021-модель йилига оид 383 нусха Outback ва Impreza’ни чақириб олади. Аниқланишича, автозавод ходими вариаторни йиғиш вақтида гайкаларни нотўғри қотирган, деб хабар беради Motor.
Чақириб олинадиган автомобиллар қаторидан 2020 йилнинг 14—21 декабрь оралиғида АҚШда йиғилган 314 нусха Outback ҳамда 69 та Impreza ўрин олган. Ички текширув натижасида маълум бўлишича, Subaru вакиллари корхона ходимларидан бири ўзгарувчан трансмиссияни йиғишда селектор тросини тортадиган гайкани қотирадиган кучланишни танлашда хатоликка йўл қўйган.
Мутахассиснинг қилган хатоси сабаб юқорида номлари келтирилган автомобилларнинг узатмалар селектори нотўғри ишлай бошлаши мумкин. Вариаторнинг (юритма билан иш бажарувчи механизм орасидаги узатиш нисбатини бир текис ўзгартирадиган қурилма) бу каби носозлиги ҳаракат вақтида жиддий оқибатларни юзага келтириши мумкин. Япон компанияси вакилларининг сўзларига кўра, хатоликка йўл қўйган ходим 91 та моделни йиғишда иштирок этишга улгурган. Бироқ ҳар эҳтимолга қарши автомобиль ишлаб чиқарувчилар ушбу ходимнинг қўли теккан бўлиши мумкин бўлган барча автомобилларни чақириб олишга қарор қилган.
Subaru эгалари 2021 йил 19 февралга қадар мазкур носозлик бўйича хабардор қилинади. Айни вақтида корхона ходимининг хатолиги сабаб юзага келган бирор-бир авария ҳақида маълумотлар келиб тушмаган.
Эслатиб ўтамиз, 2020 йилнинг октябрида Англия ва Уэльсдан Fiat-Chrysler Automobiles (FCA) дизель двигателлари ўрнатилган 500 мингга яқин автомобиль чақириб олиниши мумкинлиги тўғрисида хабар берилганди. Бунга атроф-муҳитга чиқариладиган зарарли газлар кўрсаткичи манипуляция қилинган бўлиши эҳтимоллиги сабаб бўлган.
Изоҳ (0)