Prezident taqdimnomasiga binoan Senatning 5-fevral kuni o‘tkazilgan o‘n ikkinchi yalpi majlisida Mirzo-Ulug‘bek Abdusalomov Markaziy saylov komissiyasi a’zoligidan chiqarilib, Konstitutsiyaviy sud sudyasi etib tasdiqlangan edi.
“Gazeta.uz”ning ma’lum qilishicha, shu kuniyoq Konstitutsiyaviy sudning yig‘ilishi bo‘lib o‘tdi. Unda Konstitutsiyaviy sud raisi Baxtiyor Mirboboyev lavozimidan ozod etildi.
Yig‘ilishda ochiq ovoz berish yo‘li bilan Konstitutsiyaviy sud raisi etib Mirzo-Ulug‘bek Abdusalomov saylandi. U bunga qadar qariyb 16 yil davomida Markaziy saylov komissiyasini boshqargan edi.
Baxtiyor Mirboboyev esa Konstitutsiyaviy sud sudyasi sifatida faoliyatini davom ettiradi. U rais sifatida 2017-yil 24-avgustdan beri ishlayotgan edi.
2020-yilning sentabr oyida Baxtiyor Mirboboyevning Konstitutsiyaviy sud raisi lavozimini qonunni buzgan holda egallab turganligi to‘g‘risidagi maqola tarqalgandi. Keltirilgan materiallarda 2017-yil 31-maydagi “O‘zbekiston Respublikasining Konstitutsiyaviy sudi to‘g‘risida”gi O‘zbekiston Respublikasi Konstitutsiyaviy qonunining 6-moddasi asos qilinib, unga ko‘ra Konstitutsiyaviy sudning sudyasi lavozimida bo‘lishning eng yuqori yoshi 70 yoshni tashkil etsa-da, Baxtiyor Mirboboyev 75 yoshga to‘lgani ko‘rsatilgan.
Bundan tashqari, maqolalar mualliflari qonunda ushbu sud raisligiga ikki martadan ortiq saylanish mumkin emasligi belgilangan bo‘lishiga qaramay, Baxtiyor Mirboboyev 5 marta saylangani qonun buzilishi sifatida baholangan.
Bu maqola yuzasidan Oliy Majlis Qonunchilik palatasining Korrupsiyaga qarshi kurashish va sud-huquq masalalari qo‘mitasi raisi o‘rinbosari Shuhrat Polvonov izoh bergan.
Izoh (0)