Xalq deputatlari Farg‘ona viloyati kengashining 5-fevral kuni prezident Shavkat Mirziyoyev raisligida o‘tgan sessiyasida aholini ish bilan ta’minlash va turmush sharoitlarini yaxshilash vazifalari belgilandi, deya xabar bermoqda prezident matbuot xizmati.
Ta’kidlanishicha, shahar va tumanlarni mahallabay tizimda rivojlantirish maqsadida viloyatdagi 76 ta sektorning har birida iqtisodiy kompleksning malakali xodimlaridan iborat boshqaruv ofislari tashkil etiladi.
“Bu mutaxassislar mahallaga biriktirilgan bank xodimlari bilan birga, joylardagi sharoitni o‘rganib, loyihalarni shakllantiradi va amalga oshirishga ko‘maklashadi. Zarur bo‘lsa, ishsiz aholi, yoshlar va ayollar kasb-hunarga o‘rgatiladi”, — deyiladi rasmiy axborotda.
Sessiyada Farg‘onada 2021—2022-yillarda umumiy qiymati 17 trillion so‘mlik 949 ta investitsiya loyihasi amalga oshirilishi ma’lum qilingan. Bunda kimyo, to‘qimachilik, charm-poyabzal, qurilish materiallari, elektrotexnika sanoati “drayver” bo‘ladi.
Xususan, “Farg‘onaazot” kompaniyasida jami 537 million dollarlik uchta loyiha, to‘qimachilikda 154 million dollarlik 14 ta loyiha amalga oshiriladi.
Izoh (0)