Президент тақдимномасига биноан Сенатнинг 5 февраль куни ўтказилган ўн иккинчи ялпи мажлисида Мирзо-Улуғбек Абдусаломов Марказий сайлов комиссияси аъзолигидан чиқарилиб, Конституциявий суд судьяси этиб тасдиқланган эди.
«Gazeta.uz»нинг маълум қилишича, шу куниёқ Конституциявий суднинг йиғилиши бўлиб ўтди. Унда Конституциявий суд раиси Бахтиёр Мирбобоев лавозимидан озод этилди.
Йиғилишда очиқ овоз бериш йўли билан Конституциявий суд раиси этиб Мирзо-Улуғбек Абдусаломов сайланди. У бунга қадар қарийб 16 йил давомида Марказий сайлов комиссиясини бошқарган эди.
Бахтиёр Мирбобоев эса Конституциявий суд судьяси сифатида фаолиятини давом эттиради. У раис сифатида 2017 йил 24 августдан бери ишлаётган эди.
2020 йилнинг сентябрь ойида Бахтиёр Мирбобоевнинг Конституциявий суд раиси лавозимини қонунни бузган ҳолда эгаллаб турганлиги тўғрисидаги мақола тарқалганди. Келтирилган материалларда 2017 йил 31 майдаги «Ўзбекистон Республикасининг Конституциявий суди тўғрисида»ги Ўзбекистон Республикаси Конституциявий қонунининг 6-моддаси асос қилиниб, унга кўра Конституциявий суднинг судьяси лавозимида бўлишнинг энг юқори ёши 70 ёшни ташкил этса-да, Бахтиёр Мирбобоев 75 ёшга тўлгани кўрсатилган.
Бундан ташқари, мақолалар муаллифлари қонунда ушбу суд раислигига икки мартадан ортиқ сайланиш мумкин эмаслиги белгиланган бўлишига қарамай, Бахтиёр Мирбобоев 5 марта сайлангани қонун бузилиши сифатида баҳоланган.
Бу мақола юзасидан Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси раиси ўринбосари Шуҳрат Полвонов изоҳ берган.
Мавзуга доир: Ҳалилилло Тўрахўжаев Олий суд раиси ўринбосари бўлди
Изоҳ (0)