Xalq deputatlari sessiyasidan so‘ng Shavkat Mirziyoyev kutilmaganda Farg‘ona shahridagi “Shodiyona” mahallasiga bordi. Mahalla oralab yurib, aholi bilan uchrashdi. Bu haqda Prezident matbuot xizmati xabar qildi.
“Mana, bugun viloyatlaringizga yangi hokim qo‘ydik. Mahallabay ishlash tizimini joriy qilyapmiz. Haqiqiy ahvolni bilish, odamlarning og‘irini yengil qilish uchun mahallangizga o‘zim keldim”, – dedi Shavkat Mirziyoyev ayollar bilan suhbatda.
Onaxonlardan biri 6-fevral kuni o‘g‘lining to‘yi bo‘lishini aytdi. Prezident ularni tabriklab, yosh oilaga baxt, sog‘lik tiladi. Prezident viloyat hokimi Xayrulla Bozorovga onaxonning ism-familiyasini yozib olishni tayinlab, hokim uning nomidan to‘yga borishini bildirdi.
Ta’kidlanishicha, kutilmagan tashrifdan xursand bo‘lgan odamlar davlat rahbariga sihat-salomatlik, xalq uchun tinchlik-farovonlik tilab duo qildi.
Shundan so‘ng Sohibqiron Temur ko‘chasi bo‘ylab yurilib, uy-joylar, savdo shoxobchalari ko‘zdan kechirildi.
Shavkat Mirziyoyev mahalla idorasiga kirib, mahalla raisi va maslahatchilar bilan suhbatlashdi. Aholining yashash sharoitlari, hududdagi muammolarni so‘radi. Ularni hal etish bo‘yicha mutasaddilarga ko‘rsatmalar berdi.
Avvalroq Shavkat Mirziyoyev ajralishlarning oldini olish muhimligini ta’kidlagani haqida xabar berilgandi.
Mavzuga doir:
- Shavkat Mirziyoyev farg‘onalik deputatlarga: “Ijro hokimiyatidan farg‘onacha emas, sal achchiqroq talab qilishlaringiz zarur”
- “U g‘o‘daymagan, ko‘p-ko‘p og‘ir sinovlardan o‘tgan” — Shavkat Mirziyoyev Xayrullo Bozorov haqida
- Farg‘onada 2021-yilda 105 ta ko‘p qavatli uy quriladi, 503 km yo‘l ta’mirlanadi
Izoh (0)