Shavkat Mirziyoyev Farg‘ona viloyatiga tashrifi davomida viloyatda qishloq xo‘jaligi sohasida amalga oshiriladigan loyihalar bilan tanishdi. Viloyatda Oltiariq tumanida o‘zini oqlagan tashabbus, ya’ni yoshlarga qishloq xo‘jaligi yerlarini biriktirish orqali ularning bandligini ta’minlash borasida loyihani ommalashtirish tahlil qilingan. Bu haqda “O‘zbekiston 24” telekanali tomonidan Prezidentning Farg‘onaga tashrifi oid tayyorlagan lavhasida so‘z boradi.
Prezident mamlakatdagi har bolaning ota-onasi qanday qayg‘ursa, ulardan shunchalik qayg‘urishini, yoshlarga so‘nggi ikki yilda yaratilgan imkoniyatlarni alohida ta’kidlab o‘tgan.
“Tarixda bo‘lmagan yerni bo‘lib berish, men yana bir marotaba aytaman, o‘z farzandim qiynalib o‘tiribdi, chetda yuribdi, bu yer hammamizni boqadi. Imkoniyatimiz hozircha shu. Lekin ko‘rasiz, ikki yildan keyin biz juda katta tajriba orttiramiz. Men bunga ishonaman. Bolalar ikki yildan keyin bunday gaplashmaydi men bilan. O‘zining fikrini gapiradi.
Esingizda bo‘lsa, ko‘rdingiz-ku, ‘To‘xtab turing, men talab qilaman’ dedi. Menga bu narsa yoqdi. Men shuni kutaman — talab qilish kerak. Men ham yosh bo‘lganman, unda imkoniyat yo‘q edi, hozir ‘talab qilaman’ degani ongi o‘zgarganidan dalolat. Kim bunday qiladi? O‘ziga ishongan.
Nima uchun men bularni ishontiryapman? Bular ikki yildan keyin manfaatdor bo‘lib, bankda o‘z hisobi bo‘lsa, bolasiniyam, oilasiniyam, uyiniyam olishda hech kimga qaram bo‘lmaydi. U o‘zini mehnati orqali topgan bo‘ladi, keyin u Prezident bilan gaplashishda ham kuchi-qudrati, dunyoqarashi va savol berishi boshqacha bo‘ladi”, — deydi davlat rahbari.
Eslatib o‘tamiz, Shavkat Mirziyoyev 4-fevral kuni Farg‘ona viloyatiga jo‘nab ketgandi. Safar davomida davlat rahbari Oltiariqdagi uzumchilik kooperatsiyasida bo‘ldi, Farg‘onadagi toshdan qog‘oz ishlab chiqariladigan korxonani ko‘zdan kechirdi, Vodiy Shoes korxonasiga tashrif buyurdi.
Izoh (0)