“U halol, toza va halovati yo‘q odam” – Shavkat Mirziyoyev Shuhrat G‘aniyev haqida
Ayni paytda Prezident Shavkat Mirziyoyev raisligida o‘tkazilayotgan Xalq deputatlari Farg‘ona viloyati kengashining navbatdan tashqari 26-sessiyasida davlat rahbari viloyatning sobiq hokimi Shuhrat G‘aniyev haqida so‘z yuritdi, deya xabar bermoqda “Daryo” muxbiri Mirolim Isajonov.
“G‘aniyev kimgadir yoqadi, kimgadir yoqmaydi. U bosh vazir bo‘lgan paytimdan beri yonimda yuribdi. Uning eng katta buyuk fazilati bor, u halol, toza va halovati yo‘q odam. U o‘zini yuz foiz ishga bag‘ishlagan. Farg‘ona xalqining og‘ir, sinovli kunlarida juda katta ish qildi, o‘zini ko‘rsatdi. Farg‘onada qattiqqo‘lligi, bilimi bilan viloyat rivojiga katta hissa qo‘shdi. Uni Farg‘onadagi tajribasi, halolligini inobatga olib, mamlakatdagi eng og‘ir soha – qishloq xo‘jaligi sohasiga mas’ullardan biri qilib tayinladim. U talabchanligi, qattiqqo‘lligi va halovati bilan eng og‘ir sohada ham ijobiy o‘zgarishlar qilishiga ishonaman”, — dedi davlat rahbari.
Avvalroq Shavkat Mirziyoyev Farg‘onadagi toshdan qog‘oz ishlab chiqariladigan korxonanini, Oltiariqdagi uzumchilik kooperatsiyasi, Rishtondagi kulolchilik markaziga hamda Farg‘onadagi Vodiy Shoes korxonasiga tashrif buyurgani haqida xabar berilgandi.
