Шавкат Мирзиёев Фарғона вилоятига ташрифи давомида вилоятда қишлоқ хўжалиги соҳасида амалга ошириладиган лойиҳалар билан танишди. Вилоятда Олтиариқ туманида ўзини оқлаган ташаббус, яъни ёшларга қишлоқ хўжалиги ерларини бириктириш орқали уларнинг бандлигини таъминлаш борасида лойиҳани оммалаштириш таҳлил қилинган. Бу ҳақда «Ўзбекистон 24» телеканали томонидан Президентнинг Фарғонага ташрифи оид тайёрлаган лавҳасида сўз боради.
Президент мамлакатдаги ҳар боланинг ота-онаси қандай қайғурса, улардан шунчалик қайғуришини, ёшларга сўнгги икки йилда яратилган имкониятларни алоҳида таъкидлаб ўтган.
«Тарихда бўлмаган ерни бўлиб бериш, мен яна бир маротаба айтаман, ўз фарзандим қийналиб ўтирибди, четда юрибди, бу ер ҳаммамизни боқади. Имкониятимиз ҳозирча шу. Лекин кўрасиз, икки йилдан кейин биз жуда катта тажриба орттирамиз. Мен бунга ишонаман. Болалар икки йилдан кейин бундай гаплашмайди мен билан. Ўзининг фикрини гапиради.
Эсингизда бўлса, кўрдингиз-ку, ‘Тўхтаб туринг, мен талаб қиламан’ деди. Менга бу нарса ёқди. Мен шуни кутаман — талаб қилиш керак. Мен ҳам ёш бўлганман, унда имконият йўқ эди, ҳозир ‘талаб қиламан’ дегани онги ўзгарганидан далолат. Ким бундай қилади? Ўзига ишонган.
Нима учун мен буларни ишонтиряпман? Булар икки йилдан кейин манфаатдор бўлиб, банкда ўз ҳисоби бўлса, боласиниям, оиласиниям, уйиниям олишда ҳеч кимга қарам бўлмайди. У ўзини меҳнати орқали топган бўлади, кейин у Президент билан гаплашишда ҳам кучи-қудрати, дунёқараши ва савол бериши бошқача бўлади», — дейди давлат раҳбари.
Эслатиб ўтамиз, Шавкат Мирзиёев 4 февраль куни Фарғона вилоятига жўнаб кетганди. Сафар давомида давлат раҳбари Олтиариқдаги узумчилик кооперациясида бўлди, Фарғонадаги тошдан қоғоз ишлаб чиқариладиган корхонани кўздан кечирди, Vodiy Shoes корхонасига ташриф буюрди.
Изоҳ (0)