Taniqli jamoat arbobi va jurnalist Abu-Ali Niyozmatov 7 yildan beri Regnum axborot agentligi muxbiri sifatida O‘zbekiston Tashqi ishlar vazirligidan akkreditatsiya ololmayotganini “Podrobno.uz”ga ma’lum qildi.
“Menimcha, menga zudlik bilan TIV xodimasi tomonidan jinsiy zo‘ravonlik kerak”, — degan Niyozmatov.
Uning so‘zlariga ko‘ra, akkreditatsiyani rad etish jurnalistning yuqori martabali mansabdor shaxslarga qarashli kompaniyalar tomonidan neft mahsulotlarining O‘zbekiston orqali Afg‘onistonga eksklyuziv tranziti haqida so‘z borgan maqolasiga borib taqaladi.
“Shundan so‘ng mening barcha muammolarim boshlandi, meni ushbu vazirlikning o‘ziga xos ichki hujjati bo‘lgan ‘qora ro‘yxat’ga kiritishdi”, — deb ta’kidlagan u.
Jurnalistning fikricha, bunday muammolar qatoriga O‘zbekiston matbuot va axborot agentligining da’vosi bo‘yicha sudning noqonuniy qarori bilan Niyozmatovlar oilasiga tegishli bo‘lgan kundalik nashr “Noviy Vek” — respublikadagi birinchi mustaqil gazeta litsenziyasining bekor qilinishi, 12.uz mashhur internet portalining yopilishi kabilarni kiritish mumkin.
Shuningdek, maqola chop etilganiga necha yil o‘tgan bo‘lsa ham, bu ro‘yxatda qolayotganligi va “bu nafaqat akkreditatsiya berilmayotganidan, balki boshqa ko‘plab boshqa belgilardan ham yaqqol namoyon”ligini ta’kidlagan.
Jurnalistning aytishicha, bunday “qora ro‘yxat” borligi haqida kuch ishlatar tuzilmalardagi manbasi maxfiy ravishda ma’lum qilgan va bu ro‘yxatga tushgan kishi allaqachon nafaqaga chiqqan yoki u qadar uzoq bo‘lmagan joylarda bo‘lsa ham, unga nisbatan sanksiyalar amal qilishda davom etaveradi.
“Aynan shu sababli O‘zbekiston TIV ko‘p yillardan buyon menga akkreditatsiya bermayapti. Yuqoridagi maqoladan boshqa hech qanday ‘ayb’im yo‘q”, — degan Niyozmatov.
Shuningdek, uch haftacha avval “rasmiyatchilik uchun” yana bir bor TIVga akkreditatsiya olish uchun hujjatlar topshirganini, ammo bu safar ham u besabab rad etilishi mumkinligini taxmin qilayotganini bildirgan.
Eslatib o‘tamiz, 1-fevral kuni polshalik jurnalist Agneshka Pikuliska Rustam ismli TIV xodimi unga tegajog‘lik qilganini, shuningdek, anchadan buyon TIVda akkreditatsiya ololmayotganini ma’lum qilgandi.
TIV bunga 2-fevral kuni munosabat bildirib, polshalik jurnalistdan uzr so‘radi va unga tegajog‘lik qilgan xodimini ishdan bo‘shatganini ma’lum qildi, 3-fevral kuni esa unga akkreditatsiya berdi.
Izoh (0)