Таниқли жамоат арбоби ва журналист Абу-Али Ниёзматов 7 йилдан бери Regnum ахборот агентлиги мухбири сифатида Ўзбекистон Ташқи ишлар вазирлигидан аккредитация ололмаётганини «Podrobno.uz»га маълум қилди.
«Менимча, менга зудлик билан ТИВ ходимаси томонидан жинсий зўравонлик керак», — деган Ниёзматов.
Унинг сўзларига кўра, аккредитацияни рад этиш журналистнинг юқори мартабали мансабдор шахсларга қарашли компаниялар томонидан нефть маҳсулотларининг Ўзбекистон орқали Афғонистонга эксклюзив транзити ҳақида сўз борган мақоласига бориб тақалади.
«Шундан сўнг менинг барча муаммоларим бошланди, мени ушбу вазирликнинг ўзига хос ички ҳужжати бўлган ‘қора рўйхат’га киритишди», — деб таъкидлаган у.
Журналистнинг фикрича, бундай муаммолар қаторига Ўзбекистон матбуот ва ахборот агентлигининг даъвоси бўйича суднинг ноқонуний қарори билан Ниёзматовлар оиласига тегишли бўлган кундалик нашр «Новий Век» — республикадаги биринчи мустақил газета лицензиясининг бекор қилиниши, 12.uz машҳур интернет порталининг ёпилиши кабиларни киритиш мумкин.
Шунингдек, мақола чоп этилганига неча йил ўтган бўлса ҳам, бу рўйхатда қолаётганлиги ва «бу нафақат аккредитация берилмаётганидан, балки бошқа кўплаб бошқа белгилардан ҳам яққол намоён»лигини таъкидлаган.
Журналистнинг айтишича, бундай «қора рўйхат» борлиги ҳақида куч ишлатар тузилмалардаги манбаси махфий равишда маълум қилган ва бу рўйхатга тушган киши аллақачон нафақага чиққан ёки у қадар узоқ бўлмаган жойларда бўлса ҳам, унга нисбатан санкциялар амал қилишда давом этаверади.
«Айнан шу сабабли Ўзбекистон ТИВ кўп йиллардан буён менга аккредитация бермаяпти. Юқоридаги мақоладан бошқа ҳеч қандай ‘айб’им йўқ», — деган Ниёзматов.
Шунингдек, уч ҳафтача аввал «расмиятчилик учун» яна бир бор ТИВга аккредитация олиш учун ҳужжатлар топширганини, аммо бу сафар ҳам у бесабаб рад этилиши мумкинлигини тахмин қилаётганини билдирган.
Эслатиб ўтамиз, 1 февраль куни полшалик журналист Агнешка Пикулиска Рустам исмли ТИВ ходими унга тегажоғлик қилганини, шунингдек, анчадан буён ТИВда аккредитация ололмаётганини маълум қилганди.
ТИВ бунга 2 февраль куни муносабат билдириб, полшалик журналистдан узр сўради ва унга тегажоғлик қилган ходимини ишдан бўшатганини маълум қилди, 3 февраль куни эса унга аккредитация берди.
Изоҳ (0)