Toshkent shahar Mirzo Ulug‘bek tumanida katta miqdorda pensiya va nafaqa pullarini talon-toroj qilgan bank xodimi aniqlandi, deya “Daryo”ga xabar bermoqda Bosh prokuratura.
Qayd etilishicha, Bosh prokuratura huzuridagi departamentning Mirzo Ulug‘bek tuman bo‘limi tomonidan “Xalq banki” Mirzo Ulug‘bek filialining murojaatiga asosan tergovga qadar tekshiruv o‘tkazilgan.
Tekshiruvda filialning sayyor kassa hisobchi-nazoratchisi T.T. 2020-yilning sentabr oyidan 2021-yilning yanvar oyiga qadar bo‘lgan davrda o‘ziga ishonib topshirilgan jami 170 million so‘m pensiya va nafaqa pullarini egalariga tarqatmasdan, o‘zlashtirish yo‘li bilan talon-toroj qilganligi aniqlangan.
Mazkur holat yuzasidan T.T.ga nisbatan Jinoyat kodeksining 167-moddasi 3-qismi (juda ko‘p miqdorda o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda maktab qurgan firmaning rahbarlari 631,7 mln so‘m mablag‘ni talon-toroj qilgani aniqlangani, Chilonzorda omborxonaga ikki marta kirib, jami 45 mln so‘mlik ayollar oyoq kiyimini o‘g‘irlagan shaxs ushlangani hamda Toshkentda maktablardagi texnikalarni o‘g‘irlash bilan shug‘ullangan jinoiy guruh qo‘lga olingani haqida xabar berilgandi.
Izoh (0)