Жиззах вилояти ҳудудидан ўтган М-39 магистрал йўли бўйида ноқонуний равишда тиббий буюмларни сотаётган шахс қўлга олинди, дея «Дарё»га хабар бермоқда Бош прокуратура.
Қайд этилишича, Бош прокуратура ҳузуридаги департаментнинг Дўстлик туман бўлими томонидан Жиззах вилояти божхона бошқармаси билан ҳамкорликда тадбир ўтказилган.
Тадбир давомида фуқаро Д.Р. тадбиркор сифатида давлат рўйхатидан ўтмасдан, ноқонуний даромад орттиришни кўзлаб, тиббий буюмларни дорихона ва уларнинг филиалларидан ташқарисида муомалага киритган У ҳеч қандай ҳужжатларсиз, умумий қиймати 171,9 миллион сўмлик 3 000 комплект COVID-19 вирусини аниқловчи тестлар, пульсоксиметр, махсус тиббиёт кислород ниқоби ва бошқа буюмларни туман ҳудудидан ўтувчи М-39 магистрал йўли бўйида сотаётган вақтида ушланган.
Мазкур ҳолат юзасидан Д.Р.га нисбатан Жиноят кодексининг 186-3-моддаси 3-қисми (жуда кўп миқдорда дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқанддаги соғлиқни сақлаш муассасалари томонидан 7 миллиард сўм бюджет маблағлари талон-торож қилингани аниқлангани, Тошкент вилоятида 200 қути «Ремдесивир» дорисини жами 170 миллионга сотган шахс қўлга олингани ҳамда Тошкент вилоятида 171 миллион сўмлик дори воситаларини ноқонуний муомалага киритмоқчи бўлган шахс ушлангани ҳақида хабар берилганди.
Изоҳ (0)