Andijon viloyatida so‘nggi uch yil davomida kadastr sohasiga aloqador 8 ta korrupsion holat aniqlangan. Ularning aksariyati sobiq xodimlar tomonidan sodir etilgan. Bu haqda Kadastr agentligining viloyat boshqarmasi boshlig‘i Fayoziddin Berdiqulov ma’lum qildi, deya xabar bermoqda “Daryo” muxbiri.
Ta’kidlanishicha, Andijon shahridagi Digital City texnoparkida o‘tkazilgan matbuot anjumanida Kadastr agentligi viloyat boshqarmasi tomonidan 2020-yilda bajarilgan ishlar hamda 2021-yildagi istiqbolli rejalar bo‘yicha ma’lumot berilgan.
Unda so‘z olgan Kadastr agentligining viloyat boshqarmasi boshlig‘i Fayoziddin Berdiqulov boshqarma faoliyati, sohaga oid yangiliklar bilan birga yer ajratish tizimida korrupsiyaga qarshi kurashish borasida amalga oshirilayotgan ishlar haqida ham ma’lumot bergan.
Qayd etilishicha, so‘nggi uch yil davomida viloyatning o‘zida sohaga aloqador 8 ta korrupsion holat aniqlangan. Bundan tashqari, boshqarma tomonidan o‘tkazilgan nazorat tadbirlari davomida qonun buzilishi holatlariga yo‘l qo‘ygan 14 nafar xodimga nisbatan intizomiy chora ko‘rilgan.
“Aksariyat yurtdoshlarimiz haligacha yerni qanday tartibda ajratish, kadastr hujjatlarini rasmiylashtirish jarayonlari bo‘yicha bilimga ega emas. Bu esa turli korrupsion holatlarning sodir bo‘lishiga sabab bo‘lmoqda. Achinarlisi shundaki, aksariyat korrupsion holatlar kadastrning sobiq xodimlari tomonidan amalga oshirilgan. Misol uchun, yaqinda viloyat ‘Yermulkkadastr’ davlat korxonasining sobiq xodimi M.N. Andijon tumani ‘Ayrilish’ MFY hududidagi sanoat zonasidan 30 sotix yer maydonini kadastr hujjatlari bilan rasmiylashtirib berishni va’da qilib, evaziga fuqaro A.Q.dan 15 ming dollar talab qilib, 5 ming dollarini olayotgan vaqtida qo‘lga olinganligi haqida xabar tarqaldi. Ushbu xodim korxonamizga 2019-yil 27-mayda ishga qabul qilingan. 2020-yil 25-iyun kuni esa ichki tartib qoidalarini muntazam buzganligi sababli Mehnat kodeksi 100-moddasining 3-bandi talablari asosida u bilan tuzilgan mehnat shartnomasi bekor qilingan. Sobiq xodim 6 oy ilgari egallab turgan lavozimidan ozod etilgan bo‘lsa-da, firibgarlik bilan shug‘ullanib kelayotganligi sababli tegishli tashkilotlar tomonidan ushlandi. Bunday holatlarni ko‘p misol keltirish mumkin. Shu sababli yurtdoshlarimizdan firibgarlarning tuzog‘iga ilinib qolmasligini so‘rab qolamiz”, — dedi Fayoziddin Berdiqulov.
Izoh (0)