Journal of Applied Ecology nashrida e’lon qilingan yangi tadqiqot natijalariga ko‘ra, shamol elektrostansiyalariga o‘rnatiladigan “aqlli” kameralar turli yovvoyi qushlarni aniqlash va ularning parraklar bilan to‘qnashuvi oqibatida halok bo‘lishining oldini olishga xizmat qiladi, deb yozadi IXBT.
Ma’lumotlarga ko‘ra, yirtqich qushlar o‘lja ilinjida boshini pastga qaratib uchadi va oldida nima borligiga qaramaydi. Ko‘rshapalaklar esa shamol stansiyalari bilan to‘qnashmasa ham, vafot etadi. Gap shundaki, generator past bosim zonasini hosil qiladi, bunga tushib qolgan jonzotlar ichki qon quyilishi oqibatida vafot etadi.
Tadqiqot davomida uchar obyektlarni aniqlash, ularni sinflarga ajratish va potensial to‘qnashuvning oldini olish uchun alohida trubinalarni vaqtincha to‘xtatish bo‘yicha qaror qabul qila oladigan IdentiFlight kameralar tizimining samaradorligi baholangan. Kameralar uchun Vayomingdagi Top of the World elektrostansiyasi sinov poligoni vazifasini o‘tagan.
Tadqiqotchilar IdentiFlight tizimiga ega Top of the World maydonchasida halok bo‘lgan burgutlar sonini 15 kilometr uzoqlikdagi boshqa bir maydon bilan taqqoslab ko‘rgan. Top of the World’dagi o‘lim darajasi 82 foizga kamroq chiqqan bo‘lib, bu tadqiqotchilarga IdentiFlight yuqori samaradorlikka egaligi borasida xulosaga kelishga sabab bo‘lgan.
“IdentiFlight tizimi burgutlar va qo‘riqlanadigan boshqa turdagi qushlarni yuqori optik texnologiyali sun’iy intellekt yordamida aniqlaydi. Dasturiy ta’minot va neyron tarmoqlar texnologiyasi tasvirni qayta ishlab, uning makondagi holati, tezligi, trayektoriyasi va qo‘riqlanadigan turga qanchalik oidligini tekshiradi — bularning barchasi bir necha soniyada amalga oshiriladi”, — deyiladi xabarda.
IdentiFlight ma’lumotlar bazasida 47 milliondan ortiq qo‘riqlanadigan qushlarning tasvirlari bo‘lib, bu uning yuqori aniqlikda ishlashini ta’minlaydi. Boshqacha aytganda, sun’iy intellekt shamol elektrostansiyasiga qushlarni tanlab o‘ldirishga yordam beradi.
Izoh (0)