Journal of Applied Ecology нашрида эълон қилинган янги тадқиқот натижаларига кўра, шамол электростанцияларига ўрнатиладиган «ақлли» камералар турли ёввойи қушларни аниқлаш ва уларнинг парраклар билан тўқнашуви оқибатида ҳалок бўлишининг олдини олишга хизмат қилади, деб ёзади IXBT.
Маълумотларга кўра, йиртқич қушлар ўлжа илинжида бошини пастга қаратиб учади ва олдида нима борлигига қарамайди. Кўршапалаклар эса шамол станциялари билан тўқнашмаса ҳам, вафот этади. Гап шундаки, генератор паст босим зонасини ҳосил қилади, бунга тушиб қолган жонзотлар ички қон қуйилиши оқибатида вафот этади.
Тадқиқот давомида учар объектларни аниқлаш, уларни синфларга ажратиш ва потенциал тўқнашувнинг олдини олиш учун алоҳида трубиналарни вақтинча тўхтатиш бўйича қарор қабул қила оладиган IdentiFlight камералар тизимининг самарадорлиги баҳоланган. Камералар учун Ваёмингдаги Top of the World электростанцияси синов полигони вазифасини ўтаган.
Тадқиқотчилар IdentiFlight тизимига эга Top of the World майдончасида ҳалок бўлган бургутлар сонини 15 километр узоқликдаги бошқа бир майдон билан таққослаб кўрган. Top of the World’даги ўлим даражаси 82 фоизга камроқ чиққан бўлиб, бу тадқиқотчиларга IdentiFlight юқори самарадорликка эгалиги борасида хулосага келишга сабаб бўлган.
«IdentiFlight тизими бургутлар ва қўриқланадиган бошқа турдаги қушларни юқори оптик технологияли сунъий интеллект ёрдамида аниқлайди. Дастурий таъминот ва нейрон тармоқлар технологияси тасвирни қайта ишлаб, унинг макондаги ҳолати, тезлиги, траекторияси ва қўриқланадиган турга қанчалик оидлигини текширади — буларнинг барчаси бир неча сонияда амалга оширилади», — дейилади хабарда.
IdentiFlight маълумотлар базасида 47 миллиондан ортиқ қўриқланадиган қушларнинг тасвирлари бўлиб, бу унинг юқори аниқликда ишлашини таъминлайди. Бошқача айтганда, сунъий интеллект шамол электростанциясига қушларни танлаб ўлдиришга ёрдам беради.
Изоҳ (0)