Oliy va o‘rta maxsus ta’lim vaziri o‘rinbosari Uzoqboy Begimqulov Qarshi davlat universiteti rektoriga bakalavr diplomiga ega 8 nafar talabani magistraturaga qabul qilish haqida topshiriq berdi. Biroq vazirlik ushbu topshiriq qonuniy ekanligini asoslay olmadi, deya xabar berdi “Daryo” muxbiri.
Vazirlikning ushbu topshirig‘i sabab adolatsizlikka uchraganini aytayotgan universitet talabasi Zarina Itolmasova mas’ullarga buning izohini so‘rab, qayta-qayta murojaat qilganini, biroq asosli javob eshitmaganini bildirdi.
“2020-yil Qarshi davlat universitetining xorijiy tillar fakultetini tamomlab, bakalavr diplomini oldim va shu yili magistraturaga hujjat topshirdim. Testdan 179,11 ball olib, yiqilganlar orasida uchinchilikni egalladim. Mutaxassislik fanimdan 55 foizdan yuqori ball to‘plaganim uchun huquqiy hujjatlarda ko‘rsatilganidek, qo‘shimcha kontrakt uchun hujjat topshirdim. Yiqilganlar orasida mendan yuqorida turgan ikki nafar talabaning balli mening ballimga nisbatan yuqori bo‘lgani uchun ballar ketma-ketligiga ko‘ra ular qabul qilindi. Shundan so‘ng kelasi yil topshiraman deb, tayyorgarlikni boshlab yubordim.
Keyinchalik eshitsam, bizning yo‘nalishimiz bo‘yicha yana 2 ta qo‘shimcha o‘rin berilgan. Tezda universitetga yetib bordim va qo‘shimcha o‘rin berilganini, men ro‘yxat boshida turganimni aytdim. Bilsam, mendan past ball to‘plagan va balli yetmay yiqilganlar ro‘yxatida ham eng quyida turgan talabalar qabul qilingan. Universitet rektoriga uchrashib, adolatsizlik bo‘lganini aytdim. Rektor qo‘shimcha o‘ringa kirishi lozim bo‘lgan talabalar ism-sharifi bilan vazirlikdan aytilganini, shuning uchun boshqa talabalar qabul qilinganini bildirdi. Vazirlikka murojaat qildik. Ular esa universitetga xat yuborib, qonuniylik ta’minlasin va biz shu talabaning, ya’ni meni nazarda tutib, magistraturaga kirishiga qarshi emasmiz degan mazmunda xat berdi. Rektor esa bu xat meni o‘qishga qabul qilish uchun asos bo‘lolmasligini, vazirlik 8 nafar talabani qabul qilish uchun qanday topshiriq bergan bo‘lsa, xuddi shu mazmunda xat berishi lozimligini aytdi”, — deydi Zarina Itolmasova.
Zarina Itolmasovaning qo‘shimcha ma’lumot berishicha, kuni kecha shu yo‘nalishga yana qo‘shimcha bir o‘rin berilgan. Va bu safar ham balli past, ro‘yxatda eng quyida turgan talaba magistraturaga qabul qilingan.
“Bu adolatsizlik-ku, deb universitetda shu ishga mas’ul bo‘lgan ilmiy kotib Ismoil Yo‘ldoshevga murojaat qildim. U kishi bu o‘rin ham vazirlik tomonidan yuborilganini aytib, bu sir ekanligini, sirni esa menga aytolmasligini bildirdi”, — deydi adolatsizlikka uchrayotganini aytayotgan talaba.
“Daryo” muxbiri bilan suhbatlashgan yana bir talaba Umar G‘oyipov ham vazirlikning imi-jimidagi harakati unga ham ta’sir qilayotganini bildirdi.
“2020-yil bakalavrni tamomlab, magistraturaga hujjat topshirdim. 179,9 ball bilan yiqilganlar orasida to‘rtinchi o‘rinda turibman. Biroq universitet rahbariyati qo‘shimcha kontrakka ro‘yxat asosida emas, saralab olib qabul qildi. Bu saralash sababini so‘rasak, vazirlikdan shunday topshiriq bo‘lgan deyishdi. Vaholanki, agar imtiyoz berilsa, menga o‘xshagan ota-onasi nogiron va muhtojligi borlarga imtiyoz berilmaydimi? Vazirlik qaysi hujjatga asoslanib, bunday adolatsizlikka qo‘l urdi?”, — deydi Umar G‘oyipov.
Talabalar aytayotgan mazkur adolatsizlikni izohlagan Qarshi davlat universiteti xodimi, aynan shu ishga mas’ul Ismoil Yo‘ldoshev vazirlik xati vazir o‘rinbosari Uzoqboy Begimqulov imzosi bilan taqdim etilganini aytib, xat XFU shaklida — ya’ni xizmat faoliyati uchun yuborilganini bildirdi. Hamda xatdan nusxa taqdim etolmasligini bildirdi.
“Xorijiy tillar fakultetining magistraturasiga qabul qilingan dastlabki ikki nafar talaba ballar ketma-ketligiga ko‘ra, qabul qilingan. Ammo keyin qabul qilingan 3 nafar talaba esa murojaatchi talabalarga nisbatan past ball to‘plagan bo‘lsa-da, vazirlik xatiga ko‘ra o‘qishga olingan. Vazir o‘rinbosari Uzoqboy Begimqulov imzosi bilan yuborilgan xatda ism-shariflari ko‘rsatilgan talabalar O‘zbekiston Respublikasi ta’lim muassasalariga qabul qilish bo‘yicha davlat komissiyasiga ariza bilan murojaat qilgan va shunga asoslanib, vazirlik ro‘yxatiga kiritilgan”, — deydi Ismoil Yo‘ldoshev.
Surishtiruvlardan aniqlanishicha, vazir o‘rinbosari imzosi qo‘yilgan 01—07/ 1— 1400-sonli xat 2020-yil 11-dekabr kuni universitet rektoriga yuborilgan bo‘lib, unda A.Yigitaliyev, Sh.Razzoqova, M.Norqobilova, G‘.O‘ralov, E.Xushvaqtov, M.Karimova, S.Murodova, B.Rahmonovlarni magistraturaga qabul qilib, rasmiylashtirish so‘ralgan.
Oliy va o‘rta maxsus ta’lim vazirligi axborot xizmati rahbari Farhod Babashev “Daryo” muxbirining “Vazir o‘rinbosarining universitet rektoriga yo‘llangan xatiga nega aynan 8 nafar ism-sharif ko‘rsatilgan? Nega ballar ketma-ketligiga rioya qilinmagan? Vazirlik buni qanday asoslaydi?”, deya bergan savollariga mas’ullar bilan gaplashib, ma’lumot berishini aytdi. Biroq aytilgan fursat o‘tsa-da, tayinli javob bermadi.
Farhod Babashev ham vazirlik xatida ism-sharifi ko‘rsatilganlar past ball to‘plagan bo‘lsa-da, ta’lim muassasalariga qabul qilish bo‘yicha davlat komissiyasiga ariza bilan murojaat qilganini, vazirlik xatiga davlat komissiyasidan kelgan hujjat asos bo‘lganini aytish bilan kifoyalandi. Biroq davlat komissiyasidan vazirlikka berilgan va rektorga topshiriq berishga asos bo‘lgan hujjat nomi ham, o‘zi ham oshkor qilinmadi.
Shu o‘rinda savol tug‘iladi. Xo‘sh, davlat komissiyasiga faqat shu 8 nafar talaba ariza bilan murojaat qilganmi? Nega viloyat bo‘yicha shu 8 nafar talaba ism-sharifi vazirlik xatida tilga olindi? Agar magistraturaga qabul qilish davlat komissiyasiga shunchaki ariza yozish bilan hal qilinadigan bo‘lsa, unda yuqori ball to‘plaganlar davlat komissiyasiga murojaat qilsa-da, nega qabul qilinmagan?
Yangi vazir Abduqodir Toshqulov vazirlikning axborot xizmati javob berolmagan savolga e’tibor qaratib, tayinli asos ko‘rsatadi yoki adolatsiz bo‘lgan bo‘lsa, adolatning qaror topishida tashabbus ko‘rsatadi degan umiddamiz.
Izoh (0)