Shveysariyalik tadqiqotchilar 1959-yilda Igor Dyatlov guruhining chodiri qor ko‘chkisi ostida qolgani haqidagi versiyani tasdiqladi. Olimlarning xulosalari keltirilgan maqola Communications Earth & Environment ilmiy jurnalida chop etildi, deb yozadi “RBK”.
Tadqiqotchilar aniqlashicha, ko‘chki nisbatan qiyaroq tepalikda kuchli shamollar hamda nomuvofiq joyga chodir o‘rnatgan turistlarning o‘z xatti-harakatlari natijasida paydo bo‘lgan. “Agar Dyatlov va uning guruhi chodirlarni o‘rnatish paytida tepalik qiyaligining bir qismini qordan tozalamaganida, hech qanday fojia yuz bermagan bo‘lardi. Bu qor ko‘chishi boshlanishining asosiy, ammo yagona bo‘lmagan sababidir”, — deyiladi maqolada.
Olimlar ma’lumotlariga ko‘ra, tepalikning chodir ustiga engashgan qismida kuchli katabatik shamollar (qiyaliklar bo‘ylab pastga yo‘nalgan zich va sovuq havo oqimi) tufayli ko‘p qor yig‘ilgan. Biroz vaqtdan keyin qor qatlamida yoriq paydo bo‘lgan, shundan so‘ng u sinib, ajralib, pastga qulagan.
Ural politexnika instituti turistik klubining Igor Dyatlov rahbarligidagi guruhining to‘qqiz chang‘ichisi 1959-yil fevralida Shimoliy Uralda Xolatchaxl tog‘i va nomsiz balandlik (905 metr) yaqinida halok bo‘lgan. Shu atrofda joylashgan dovon marhumlar xotirasiga “Dyatlov dovoni” deb nom oldi.
Rossiya Bosh prokuraturasining rasmiy versiyasiga ko‘ra, turistlar sovuq tufayli halok bo‘lgan. Aytilishicha, ularni qor ko‘chkisi sababli chodirni tark etgan, ammo keyin uni topa olmasdan, muzlab qolgan. Shuningdek, muqobil nazariyalar ham mavjud bo‘lib, masalan, guruh noma’lum qurol sinovdan o‘tkaziladigan hududga tushib qolgani yoki paranormal hodisalar ta’siriga uchragani taxmin qilinadi. 2020-yil iyulida Bosh prokuratura turistlarning dovondagi halokati sabablari haqidagi masala uzil-kesil yopilganini ma’lum qildi.
Izoh (0)