Germaniyadagi Robert Kox nomli virusologiya institutining vaksinatsiya bo‘yicha doimiy komissiyasi (STIKO) 18 yoshdan 64 yoshgacha bo‘lgan fuqarolar uchun AstraZeneca ingliz-shved farmatsevtika kompaniyasining vaksinasidan foydalanishni tavsiya qildi. Bu haqda Deutsche Welle (DW) nashriga tayanib, “RBK” xabar berdi.
Mutaxassislarning ta’kidlashicha, 65 yoshdan oshganlar uchun preparatning samarali ekaniga oid dalillar yetarli emas, deyiladi xabarda.
STIKO — Germaniya uchun emlash bo‘yicha tavsiyalar ishlab chiqadigan mustaqil ekspertlar qo‘mitasidir. Yevropa Ittifoqidagi mamlakatlarda vaksinalarni qo‘llash bo‘yicha ruxsatnoma Yevropa Dori-darmon agentligi (EMA) tomonidan beriladi. DW’ning ta’kidlashicha, 29-yanvar kuni agentlik AstraZeneca vaksinasidan foydalanish yoki foydalanmaslik haqidagi qarorni qabul qilishi kerak. Hozirda mazkur vaksinadan Buyuk Britaniyadagi emlash kampaniyalarida keng foydalanilmoqda.
Yevropa Ittifoqining turli mamlakatlarida koronavirusga qarshi emlash 2020-yilning dekabr oyi oxiri — 2021-yilning yanvar oyi boshlarida boshlangan. Hozirgacha mazkur mamlakatlarda EMA tomonidan qo‘llash tasdiqlangan Pfizer/BioNTech va Moderna vaksinalaridan foydalaniladi. EMA ulardan birinchisini 16 yoshdan, ikkinchisini 18 yoshdan boshlab qo‘llashga ruxsat berdi, vaksinalar uchun eng yuqori yosh chegarasi belgilanmagan.
Nemis ommaviy axborot vositalari ilgari AstraZeneca preparatining keksalar uchun samaradorligi past ekani haqida yozgan. Bild va Handelsblatt nashrlari mazkur vaksina 65 yoshdan oshgan odamlarning 10 foizidan kamrog‘ida antitanalar ishlab chiqaradi, deya xabar bergan. Kompaniya esa ushbu ma’lumotlarni “mutlaqo noto‘g‘ri” deb atagan hamda Buyuk Britaniyaning vaksinatsiya va immunizatsiya bo‘yicha birlashgan qo‘mitasi tomonidan AstraZeneca’ni keksalarda qo‘llash ma’qullangani va emlanganlarda immunitet miqdori ortayotganini ta’kidlagan.
AstraZeneca Yevropa mamlakatlariga vaksina yetkazib berishni qisqartirmoqchiligini ma’lum qildi. 2021-yilning dastlabki uch oyida kompaniya buyurtma qilingan partiyaning 60 foizi — deyarli 31 million dozadagi vaksinani yetkazib bermaydi. Kompaniyaning Yevropa Ittifoqi bilan tuzilgan shartnomasida mart oyiga qadar 80 million dozali preparatni yetkazib berish nazarda tutilgan.
Avvalroq Avstraliyada olimlar AstraZeneca vaksinasining samaradorligiga shubha bildirgandi.
Britaniyada aholini AstraZeneca vaksinasi bilan emlash yanvar oyining boshidan beri davom etmoqda. Birinchi bo‘lib vaksinani 82 yoshli Brayan Pinker qabul qilgandi.
Izoh (0)