Qozog‘istonning korrupsiyaga qarshi kurashish agentligi raisi Alik Shpekbayev amaldorlarga kichik va o‘rta darajadagi korrupsion jinoyatlari uchun jazo sifatida jamoat ishlariga tayinlashni taklif qilmoqda, deb xabar berdi “Interfaks”.
“Iqtisodiy hamkorlik va taraqqiyot tashkilotidagi bir qator mamlakatlarda jamoat ishlari korrupsiyaga oid jinoyatlar uchun asosiy yoki qo‘shimcha jazo sifatida samarali qo‘llanilmoqda. Xususan, Buyuk Britaniyada mahkumlarga ‘jamiyat haqini qaytarish’ yozuvli yorqin rangdagi nimchalar kiydirish va ularni ko‘cha ishlariga majburlash odat tusiga kirgan”, — dedi Shpekbayev.
Uning so‘zlariga ko‘ra, ushbu turdagi jazo psixologik jihatdan ancha samarali bo‘lib, jamiyat o‘z “qahramonlarini” tanib oladi.
“Kichik va o‘rta og‘irlikdagi korrupsiya jinoyatlari uchun jamoat ishlariga jalb qilishning Jinoyat qonunchiligi bilan tartibga solingan bo‘lishiga qaramay, Qozog‘istonda mazkur jazo turi sud tomonidan amalda qo‘llanilmaydi. Mening fikrimcha, bu institutni birinchi navbatda, eng kuchli profilaktik ta’sir nuqtai nazaridan faollashtirish kerak”, — deya xulosa qildi agentlik raisi.
Avvalroq Qozog‘iston o‘lim jazosidan rasman voz kechgani, mamlakatda pora uchun mahkum qilinganlarni muddatidan ilgari ozod qilish taqiqlangani haqida xabar berilgandi.
Izoh (0)