Швейцариялик тадқиқотчилар 1959 йилда Игор Дятлов гуруҳининг чодири қор кўчкиси остида қолгани ҳақидаги версияни тасдиқлади. Олимларнинг хулосалари келтирилган мақола Communications Earth & Environment илмий журналида чоп этилди, деб ёзади «РБК».
Тадқиқотчилар аниқлашича, кўчки нисбатан қияроқ тепаликда кучли шамоллар ҳамда номувофиқ жойга чодир ўрнатган туристларнинг ўз хатти-ҳаракатлари натижасида пайдо бўлган. «Агар Дятлов ва унинг гуруҳи чодирларни ўрнатиш пайтида тепалик қиялигининг бир қисмини қордан тозаламаганида, ҳеч қандай фожиа юз бермаган бўларди. Бу қор кўчиши бошланишининг асосий, аммо ягона бўлмаган сабабидир», — дейилади мақолада.
Олимлар маълумотларига кўра, тепаликнинг чодир устига энгашган қисмида кучли катабатик шамоллар (қияликлар бўйлаб пастга йўналган зич ва совуқ ҳаво оқими) туфайли кўп қор йиғилган. Бироз вақтдан кейин қор қатламида ёриқ пайдо бўлган, шундан сўнг у синиб, ажралиб пастга қулаган.
Урал политехника институти туристик клубининг Игор Дятлов раҳбарлигидаги гуруҳининг тўққиз чанғичиси 1959 йил февралида Шимолий Уралда Холатчахл тоғи ва номсиз баландлик (905 метр) яқинида ҳалок бўлган. Шу атрофда жойлашган довон марҳумлар хотирасига «Дятлов довони» деб ном олди.
Россия Бош прокуратурасининг расмий версиясига кўра, туристлар совуқ туфайли ҳалок бўлган. Айтилишича, уларни қор кўчкиси сабабли чодирни тарк этган, аммо кейин уни топа олмасдан, музлаб қолган. Шунингдек, муқобил назариялар ҳам мавжуд бўлиб, масалан, гуруҳ номаълум қурол синовдан ўтказиладиган ҳудудга тушиб қолгани ёки паранормал ҳодисалар таъсирига учрагани тахмин қилинади. 2020 йил июлида Бош прокуратура туристларнинг довондаги ҳалокати сабаблари ҳақидаги масала узил-кесил ёпилганини маълум қилди.
Изоҳ (0)