26 январь куни соат 10:30 ларда Бектемир ЙПХ масканида ИИО ходимлари томонидан ўзида шубҳа уйғотган 36 ёшли Қирғизистон фуқароси холислар иштирокида кўзган кечирилганида, унинг ёнидан 8,34 грамм кўкнори бошоғи топилган. Бу ҳақда Тергов департаменти хабар берди.
Маълум қилинишича, Б.Б. исмли қирғизистонлик эркак 38 ёшли Д.Ш. бошқарувида бўлган кул ранг Mercedes-Benz автомобили Тошкент вилоятидан Тошкент шаҳрига қараб ҳаракатланиб келаётган бўлган. Ўзида шубҳа уйғотганлиги сабаб Б.Б. холислар иштирокида кўздан кечирилганида, унинг эгнидаги қора рангли эркаклар курткасининг олд ўнг чўнтагидан қоғозга ўралган, яшил рангли, 9 дона ўткир ҳидли ўсимлик бошоқлари борлиги аниқланиб, тегишли тартибда расмийлаштириб олинган.
Тошкент шаҳар ИИББ ЭКМнинг хулосасига кўра, Б.Б.дан олинган 9 дона ўсимлик бошоқлари таркибида опий гуруҳига мансуб бўлган гиёҳванд алкалоидлар — морфин, кодеин, тебаин мавжуд бўлиб, кўкнори бошоғи деб аталиши, бошоқнинг оғирлиги 8,34 граммга тенглиги аниқланган.
Олиб борилган терговга қадар текширув жараёнида, ушбу гиёҳванд моддаси Б.Б. 25 январь куни тахминан соат 07:00 ларда Қозоғистон ҳудудидан Ўзбекистон ҳудудига «Ғишткўприк» чегара пости орқали, божхона назоратини четлаб олиб ўтиб ёнида сақлаб келганлиги аниқланган.
Мазкур ҳолат юзасидан Бектемир тумани бўйича ИИО ФМБ Тергов бўлинмаси томонидан Б. Б.га нисбатан Жиноят кодекснинг 276-моддаси 1-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) ҳамда 246-моддаси 1-қисми (контрабанда) билан жиноят иши қўзғатилиб, процессуал тартибда ушланган. Ҳозирда тергов ҳаракатлари олиб борилмоқда.
Аввалроқ Бухорода фарзандининг ётоқхонасида гиёҳванд модда сақлаб келган ота қўлга олингани, Самарқандда деярли 600 долларга гиёҳванд модда сотган икки йигит ушлангани, шунингдек, Андижонда гиёҳванд модда сотган 4 киши қўлга олингани тўғрисида хабар берилганди.
Изоҳ (0)