“Daryo”ga murojaat qilib, toshkentlik tadbirkor tomonidan saxovat qilingan 100 million so‘m pulga ega chiqolmaganini aytgan ayollardan biri — Zilola Norqulova Qarshi tumani hokimi Maqsuda Mustafoyevaning xizmat xonasida begona ayol tomonidan “razbor” qilinganini aytmoqda.
Bu haqda xabar bergan “Daryo” muxbirining yozishicha, murojaatchi ayollar hokimiyat binosida, aynan hokimning xizmat xonasida ularga nisbatan bo‘layotgan ruhiy bosimga tuman prokuraturasi ham jim qarab turganini bildirgan.
“Kecha soat taxminan 15:30 da Muqaddas opa orqali meni hokimiyatga chaqirishdi. Kelsam, Muqaddas opa, Latofat opa va menga notanish ayol bor ekan. O‘sha notanish ayol men bilan gaplashmoqchiligini aytdi. ‘Kimsiz, ismingizni ayting’ degandim, ‘Tadbirkorman, opa deb murojaat qilavering’, dedi. Keyin menga gaplashib olishimiz kerak deb, hokim opaning xizmat xonasiga olib kirdi. Muqaddas opa esa ‘Sizlar meni aralashtirmay gaplashib olinglar’, dedi”, — deydi Zilola Norqulova.
Murojaatchi ayolning aytishicha, o‘zini tadbirkor sifatida tanishtirgan vodiylik ayol unga “Otabekning nomerini qayerdan olgansiz, topib bering bizga. Shikoyatingizni qaytarib oling, eringiz Qamashidan, o‘zingiz Batoshdan. Agar hozir hokim ko‘tar-ko‘tar qilsa, sizni Qamashiga ‘fisht’ qilib yuborishadi”, degan.
Qarshi tuman hokimligining tashkiliy nazorat guruhi rahbari Nuriddin Qo‘ldoshevning aniqlik kiritishicha, murojaatchi ayollarga ruhiy bosim o‘tkazib, fuqaroni hokimning xizmat xonasida “razbor” qilishga jur’at topgan ayolning ismi Umida. Murojaatchilarga o‘zini tadbirkor sifatida tanishtirgan bu ayol hokimlik mas’ullariga bloger ekanligini aytgan.
Ajablanarlisi, hokim yo‘q paytda uning xizmat xonasiga bemalol kirib, hattoki fuqarolarga bosim o‘tkazishga jur’at topgan ayolning kirib-chiqishi kuzatuv kameralariga ham tushmagan. Mas’ullarning aytishicha, o‘sha kuni hokimlik binosiga o‘rnatilgan kuzatuv kameralari ham ishlamagan.
Qarshi tumani hokimi Maqsuda Mustafoyeva o‘zi yo‘q paytda xizmat xonasiga bemalol kirib-chiqib yurgan va hatto murojaatchi ayollarga ham ruhiy bosim o‘tkazishga jazm qilgan, ammo kuzatuv kameralariga tushmagan shaxsning kimligiga aniqlik kiritsa, nur ustiga a’lo nur bo‘lardi.
AOKAning viloyatdagi mas’uli Usmon Nusurovning “Daryo” muxbiriga ma’lumot berishicha, Qarshi tumani hokimligi 30-yanvar kuni Qarshi shahridagi Jurnalistlar uyida OAV vakillari hamda blogerlarning 100 million so‘m mashmashasiga doir savollariga javob beradi.
Izoh (0)