Xalqaro valyuta jamg‘armasi (XVJ) hisobotiga ko‘ra, 2020-yil oxiriga kelib koronavirus pandemiyasida milliy iqtisodiyotni moliyaviy qo‘llab-quvvatlash uchun hukumatlarga ko‘rsatilgan yordam hajmi jami 14 trillion dollarga yetgan. Ushbu mablag‘larning 7,8 trillion dollari qo‘shimcha xarajatlar va daromadlardan voz kechishga, 6 trillion dollari esa kafolatlar, kreditlar va kapital qo‘yilmalariga yo‘naltirilgan.
“Ushbu qo‘llab-quvvatlov turli mamlakatlarda pandemiya oqibatida yuzaga kelgan o‘zgarishlarga va hukumatlarning zayomlar olish qobiliyatiga bog‘liq ravishda shakllangan”, — deyiladi tadqiqotda.
XVJ tahlilchilarining ta’kidlashicha, rivojlangan mamlakatlarda moliyaviy qo‘llab-quvvatlash choralari bir necha yilga tasdiqlangan, rivojlanayotgan mamlakatlarda bu choralar qisqa muddatli bo‘lgan. Umuman olganda, moliyaviy qo‘llab-quvvatlash, iqtisodiy tanazzul bilan birga, hukumat qarzlari va defitsitlarining ko‘payishiga olib keldi.
Dunyo davlatlarida o‘rtacha qarz 2020-yilning oxirida global YaIMning 98 foiziga yaqinlashdi. Pandemiya boshlanishidan avval bu ko‘rsatkich 84 foiz bo‘lishi taxmin qilingandi.
Avvalroq dunyodagi eng boy odamlar 3 yil ichida pandemiya oqibatlarini bartaraf etishlari mumkinligi, WSJ so‘mdagi O‘zbekiston obligatsiyalariga nima sababdan talab yuqoriligini tushuntirib bergani hamda Jahon banki O‘zbekistondagi islohotlarni qo‘llab-quvvatlashga 500 million dollar ajratgani haqida xabar berilgandi.
Izoh (0)