Халқаро валюта жамғармаси (ХВЖ) ҳисоботига кўра, 2020 йил охирига келиб коронавирус пандемиясида миллий иқтисодиётни молиявий қўллаб-қувватлаш учун ҳукуматларга кўрсатилган ёрдам ҳажми жами 14 триллион долларга етган. Ушбу маблағларнинг 7,8 триллион доллари қўшимча харажатлар ва даромадлардан воз кечишга, 6 триллион доллари эса кафолатлар, кредитлар ва капитал қўйилмаларига йўналтирилган.
«Ушбу қўллаб-қувватлов турли мамлакатларда пандемия оқибатида юзага келган ўзгаришларга ва ҳукуматларнинг заёмлар олиш қобилиятига боғлиқ равишда шаклланган», — дейилади тадқиқотда.
ХВЖ таҳлилчиларининг таъкидлашича, ривожланган мамлакатларда молиявий қўллаб-қувватлаш чоралари бир неча йилга тасдиқланган, ривожланаётган мамлакатларда бу чоралар қисқа муддатли бўлган. Умуман олганда, молиявий қўллаб-қувватлаш, иқтисодий таназзул билан бирга, ҳукумат қарзлари ва дефицитларининг кўпайишига олиб келди.
Дунё давлатларида ўртача қарз 2020 йилнинг охирида глобал ЯИМнинг 98 фоизига яқинлашди. Пандемия бошланишидан аввал бу кўрсаткич 84 фоиз бўлиши тахмин қилинганди.
Аввалроқ дунёдаги энг бой одамлар 3 йил ичида пандемия оқибатларини бартараф этишлари мумкинлиги, WSJ сўмдаги Ўзбекистон облигацияларига нима сабабдан талаб юқорилигини тушунтириб бергани ҳамда Жаҳон банки Ўзбекистондаги ислоҳотларни қўллаб-қувватлашга 500 миллион доллар ажратгани ҳақида хабар берилганди.
Изоҳ (0)