Ukraina prezidenti Vladimir Zelenskiy Milliy xavfsizlik va mudofaa kengashi (MXMK)ning Rossiyaning yuridik va jismoniy shaxslariga qarshi yakka tartibda sanksiyalar kiritish qarorini kuchga kiritdi, deb xabar beradi “RBK”.
Davlat rahbari saytida e’lon qilingan farmonga ko‘ra, MXMK qarorining bajarilishi ustidan nazorat uchun idora rahbari Aleksey Danilov mas’ul qilingan. Sanksiya ro‘yxatining o‘zi havola qilinmagan. Hujjatda ta’kidlanishicha, MXMKning qarorlaridan biri sir tutilgan.
Zelenskiy Ukraina vazirlar mahkamasiga, Xavfsizlik xizmatiga va Milliy bankka “ushbu qarorda ko‘zda tutilgan sanksiyalarning amalga oshirilishini va ularning samaradorligi ustidan nazoratni ta’minlash”ni topshirgan. Ukraina Tashqi ishlar vazirligi sanksiyalar kiritilgani haqida Yevroittifoq va AQShni xabardor qilishi hamda “ularning oldiga xuddi shunday cheklov choralarini qo‘llash masalasini qo‘yishi” kerak bo‘ladi.
O‘tgan yil dekabrida “Rossiya” bankining sho‘basi — “Yujniy proyekt” Qrimdagi “Massandra” vinochilik va uzumchilik birlashmasi aksiyalarining 100 foiziga egalik qilgach, Ukraina Vaqtinchalik bosib olingan hududlarni reintegratsiya qilish vazirligi Rossiyaga nisbatan yangi sanksiyalar tayyorlanayotganini ma’lum qilgan edi. Kiyevda “Massandra” Ukraina madaniy merosining bir qismi deb ataldi.
27-yanvar kuni esa Oliy rada deputati Aleksey Goncharenko mamlakat vazirlar mahkamasi aviatsiya sohasida ishlaydigan 13 ta Rossiya kompaniyasiga qarshi sanksiyalarni ma’qullaganini bildirdi. Bunga esa Kiyev tomonidan bosib olingan hudud deb hisoblanuvchi Qrimga reyslar amalga oshirilgani sabab bo‘lgan.
Ma’lumot uchun: Qrim 2014-yilda yarim orol aholisi o‘rtasida o‘tkazilgan referendum yakunlariga muvofiq Rossiya tarkibiga kirgan. Ukraina va G‘arb davlatlari bu hodisani anneksiya (bosib olish) deb hisoblaydi. Moskva esa jarayon xalqaro huquq doirasida o‘tkazilganini ta’kidlab, yarim orolning tarixiy tegishlilik masalasini yopgan.
Izoh (0)