“Real” yarim himoyachisi Martin Edegor ijara asosida “Arsenal”ga yo‘l oldi. Bu haqda londonliklar matbuot xizmati ma’lum qilmoqda.
Norvegiyalik futbolchi 2020/21-yilgi mavsumning qolgan qismini londonliklar safida o‘tkazadi. U “Arsenal”da 11-raqam ostida harakat qiladi.
The Times nashrining xabar qilishicha, “kanonirlar” 22 yoshli o‘yinchining yarim yillik ijarasi uchun Madrid jamoasiga 2 million yevro to‘laydi. Shuningdek, “Arsenal” Edegorning o‘ziga haftasiga 43 ming yevro maosh to‘laydi.
Ijara shartnomasida futbolchini sotib olish huquqi yoki majburiyati haqidagi band yo‘q.
Edegor La Liga joriy mavsumida 7 ta o‘yin o‘tkazdi. Futbolchi 2019/20-yilgi mavsumda “Real Sosyedad” safida ijara asosida harakat qildi. O‘tgan mavsum u Primeraning 31 uchrashuvuda maydonga tushib, 4 ta gol va 7 ta golli uzatma muallifiga aylangandi.
Eslatib o‘tamiz, madridliklarning yana bir markaziy yarim himoyachisi Dani Sebalyos ham “Arsenal”da ijara asosida harakat qiladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)