FIFA legioner futbolchilardan qarzdorligi sabab to‘rtta o‘zbek klubiga yangi futbolchilari ro‘yxatdan o‘tkazishni rasman taqiqlagan, deya ma’lum qildi PFL bosh direktorligi vazifasini bajaruvchi Diyor Imomxo‘jayev.
Bu jamoalar: “Qo‘qon-1912”, “Andijon”, “Sho‘rtan” va “Surxon”.
“Qo‘qon-1912” Boyan Knejevich hamda Milosh Nikolich bilan bog‘liq muammoga ega. Klub bu futbolchilar pullarini to‘lab, FIFAga murojaat qildi va taqiq yaqin vaqt ichida olib tashlanishi kutilmoqda.
“Andijon” Vitaliy Mirniy bilan kelishuvga erishdi hamda FIFAga hisobot berdi. Radoslav Aleksich bilan qisman hisob-kitob qilindi, tez orada uning muammosi ham hal bo‘ladi. Endilikda klub Ibe Mikael Okorodan qarzdorlik masalasini yopish arafasida. Biroq bu muammoning hammasi emas. FIFA Predrag Vuyovich ishi bo‘yicha “Andijon”ga yana bir marta tartib-intizom ishi ochgan. FIFA 25-fevral kuni ishni ko‘rib chiqadi. Klub esa allaqachon futbolchining yuristi bilan aloqaga chiqqan va muzokara o‘tkazmoqda. Ta’kidlanishicha, “Andijon” 25-fevralni kutib o‘tirmay, bu ishni ham hal qilmoqchi.
“Sho‘rtan”da muammo yetarli. Klubning Vitaliy Varivonchik va Igor Kriushenko bilan bog‘liq qarzdorlik masalasini hali ham hal qilgani yo‘q.
“Surxon” rahbariyati Vladimir Bubanya bilan faol muzokaraga kirishgan. Muammo hal qilinganidan keyingina FIFA taqiqni olishi mumkin.
FIFA taqiqini olib tashlamagunga qadar PFL yuqoridagi klublar futbolchilarini ro‘yxatdan o‘tkazmaydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)