Коронавирусга қарши курашда яхши натижаларга эришилганига қарамай, уни енгиш қийин бўлади. Бу ҳақда ЖССТнинг соғлиқни сақлаш соҳасидаги фавқулодда вазиятлар бўйича дастурининг ижрочи директори Майкл Райан брифинг давомида маълум қилди, деб хабар беради «РБК». У COVID-19 эндемик касалликка айланишини истисно этмаган — уни бутунлай йўқотиш жуда мушкул.
«Инсоният ҳозирча фақат қорачечакни енгишга муваффақ бўлган», — дейди Райан. Полиомиэлит ва қизамиқ каби касалликларни ҳозирга қадар бутунлай йўқотишнинг имкони бўлмаган.
Шу сабабли коронавирусни енгиш ҳам осон бўлмайди: чунки COVID-19 дунёнинг деярли барча мамлакатларида тарқалиб улгурди, вакцинадан фойдаланишга эса ҳозирча ҳамманинг ҳам қурби етмайди.
Давлатлар коронавирус оқибатида юзага келадиган ўлим ҳолатини камайтириш ва нормал ҳаёт тарзига қайтиш имконияти бор, бироқ вакцинация кенг тарқалмаса, COVID-19 билан касалланиш давом этаверади.
Брифинг давомида ЖССТ раҳбари Тедрос Гебрейесус «вакцина национализми» жаҳон иқтисодиётига 9 триллион доллардан ортиқ зарар келтириши мумкинлигини маълум қилган, хусусан, ушбу маблағларнинг ярми — 4,5 триллион доллар ривожланган давлатлар ҳисобига тўғри келади.
Жонс Ҳопкинс университети маълумотларига кўра, бутун дунёда коронавирусга чалинганлар сони 100 миллион кишига яқинлашмоқда, ҳозирга қадар 2,1 миллион бемор COVID-19 қурбонига айланган.
Эслатиб ўтамиз, АҚШда 14 декабрь куни коронавирусга қарши Pfizer/BioNTech вакцинаси билан, 18 январдан эса Россияда «Спутник V» вакцинаси билан оммавий эмлаш бошланган.
Изоҳ (0)