10-yanvar kuni Jizzax shahrida yangi qurilayotgan ko‘p qavatli uyning bir qismi qulab tushgan edi. Qulab tushgan bino yonidagi 6 qavatli inshootning ham poydevorlarida cho‘kish alomatlari kuzatilgani va u xavfli holatda turgani to‘g‘risida xabar berilgandi. Ijtimoiy tarmoqlarda qulagan bino yonidagi 6 qavatli inshoot ham buzilayotgani tasvirlangan videolar tarqaldi.
Kadrlardan ko‘rish mumkinki, ikkita maxsus texnika bino yonidagi tuproq uyumiga chiqib, devorlarni sekin-asta buzmoqda.
Avvalroq qurilish vaziri Botir Zokirov tik turgan obyektning qanday usulda buzilishi haqida ma’lumot berib, binoni buzishga kerak bo‘ladigan texnika O‘zbekistonda yo‘qligini aytgandi.
“O‘zog‘irsanoatloyiha” bu binoga yaqinlashib bo‘lmasligi va uning 50 metr atrofini to‘sib qo‘yish kerakligini aytyapti. Shu binoni buzish uchun 50 tonnalik maxsus yukni 40 metrgacha ko‘tarib, kesadigan mashina kerak. O‘zbekistonda bunday mashina yo‘q, bizda undan kichkinasi bor. Uni buzish uchun binoning ikki tomoniga 10 ming kub tuproq to‘kib, tiraydi va obyektni tepadan buzib tushadi”, — degan edi vazir.
Eslatib o‘tamiz, mazkur falokatni o‘rganish maqsadida bosh vazirning birinchi o‘rinbosari Ochilboy Ramatov boshliq hukumat komissiyasi tuzilgan. Shuningdek, mazkur holat yuzasidan o‘tkazilgan tergovga qadar tekshiruv natijasiga ko‘ra, Jizzax viloyati qurilish sohasida hududiy nazorat inspeksiyasi mansabdor shaxslariga nisbatan Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Izoh (0)