10 январь куни Жиззах шаҳрида янги қурилаётган кўп қаватли уйнинг бир қисми қулаб тушган эди. Қулаб тушган бино ёнидаги 6 қаватли иншоотнинг ҳам пойдеворларида чўкиш аломатлари кузатилгани ва у хавфли ҳолатда тургани тўғрисида хабар берилганди. Ижтимоий тармоқларда қулаган бино ёнидаги 6 қаватли иншоот ҳам бузилаётгани тасвирланган видеолар тарқалди.
Кадрлардан кўриш мумкинки, иккита махсус техника бино ёнидаги тупроқ уюмига чиқиб, деворларни секин-аста бузмоқда.
Аввалроқ қурилиш вазири Ботир Зокиров тик турган объектнинг қандай усулда бузилиши ҳақида маълумот бериб, бинони бузишга керак бўладиган техника Ўзбекистонда йўқлигини айтганди.
«Ўзоғирсаноатлойиҳа» бу бинога яқинлашиб бўлмаслиги ва унинг 50 метр атрофини тўсиб қўйиш кераклигини айтяпти. Шу бинони бузиш учун 50 тонналик махсус юкни 40 метргача кўтариб, кесадиган машина керак. Ўзбекистонда бундай машина йўқ, бизда ундан кичкинаси бор. Уни бузиш учун бинонинг икки томонига 10 минг куб тупроқ тўкиб, тирайди ва объектни тепадан бузиб тушади», — деган эди вазир.
Эслатиб ўтамиз, мазкур фалокатни ўрганиш мақсадида бош вазирнинг биринчи ўринбосари Очилбой Раматов бошлиқ ҳукумат комиссияси тузилган. Шунингдек, мазкур ҳолат юзасидан ўтказилган терговга қадар текширув натижасига кўра, Жиззах вилояти қурилиш соҳасида ҳудудий назорат инспекцияси мансабдор шахсларига нисбатан Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
Изоҳ (0)