Samarqand viloyat IIB Terorizm va ekstrimizmga qarshi kurashish boshqarmasining tog‘li va chegaradosh hududlaridagi tezkor bo‘linmalari tomonidan o‘tkazilgan tadbirda Jomboy tumanining “Kattaqishloq” mahallasida yashovchi fuqaro uyida qimorxona tashkil qilgani aniqlangan. Bu haqda “Daryo”ga viloyat IIB axborot xizmati xabar berdi.
Ta’kidlanishicha, 1977-yilda tug‘ilgan D.Sh. qarindoshi 1973-yilda tug‘ilgan fuqaro O.P. bilan oldindan jinoiy til biriktirib, yashash xonadonining omborxonasida xo‘roz jangi o‘yinini tashkil qilgan.
Ma’lumotlarga ko‘ra, xonadon egasi xo‘roz jangini tomosha qilish uchun kelgan har bir fuqarodan 20 ming so‘mdan pul olib jang maydoniga kiritgan. O‘tkazilgan tadbir jarayonida xo‘roz jangiga 60 nafardan ziyod tamoshabin qatnashayotgani aniqlangan.Tadbir davomida qimorxona tashkil etgan fuqaro O.P.dan jami 506 ming so‘m pul xolislar ishtirokida daliliy ashyo tariqasida hujjatlashtirib olingan.
Holat yuzasidan Jomboy tuman IIB huzuridagi Tergov bo‘limi tomonidan Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) 1-qismi bilan jinoyat ishi qo‘zg‘atilib tergov harakatlari olib borilmoqda.
Izoh (0)