Shahrisabz shahar tibbiyot birlashmasi tug‘ruq bo‘limining bir qismi sotilgani aytildi. Shaharning yosh hokimi Sabrina Tursunova esa masalaga aniqlik kiritish maqsadida mas’ullarni savolga tutdi, deya xabar berdi “Daryo” muxbiri.
Ma’lum bo‘lishicha, yosh hokim Sabrina Tursunova 2021-yilning 20-yanvar kuni shahar tibbiyot birlashmasining tug‘ruq bo‘limida bo‘lib, voqeadan xabar topgan.
Yosh hokim bilan suhbatlashgan hamshiraning aytishicha, tug‘ruqxonaning bir qismi sotilgani sabab ayni paytdagi holati talabga javob bermaydi.
“Shifokorlarning dardi ko‘p. Eng asosiy muammo ‘roddom’ning sotilgani bo‘ldi. Shu paytga qadar ‘roddom’ sotilmagandi. Lekin 2018-yil sotildi. Biz bu haqda tegishli tashkilotlarga murojaat qildik. Hatto deputatlarga ham bu haqda xabar berib, ularni muammodan boxabar qildik. Ammo muammo haligacha yechilmay qolmoqda”, — dedi hamshira yosh hokim bilan muloqotda.
Yosh hokimga shikoyat qilgan tibbiyot xodimlarining aytishicha, bo‘lim ta’mirtalab ahvolga ham kelib qolgan.
Shahar tibbiyot birlashmasining tug‘ruq bo‘limi boshlig‘i Shokir Umarovning aniqlik kiritishicha, bo‘lim 140 koykali ikki blokdan iborat bo‘lib, birinchi blogining bir qavati shahar tibbiyot birlashmasida faoliyat yurituvchi ikki nafar shifokorga, tadbirkor sifatida ijaraga berilgan.
“Bo‘limning bir qismi shahar tibbiyot birlashmasining shoshilinch bo‘limi boshlig‘i Murodilla Egamberdiyevga ijara asosida berilgan bo‘lsa, yana bir qismi shifokor Ilhom Mansurovga berilgan. Bo‘limning bir blogi tadbirkorlarga ijaraga berib yuborilgan bo‘lsa-da, bo‘limning 140 koykadan iboratligini saqlab qolish maqsadida 2 ta krovat joylashishi kerak bo‘lgan xonalarga 4-5 tadan krovatlar joylashtirilgan. Bu nafaqat bemorlarga, bizga ham noqulaylik tug‘dirmoqda”, — deydi bo‘lim boshlig‘i.
Shokir Umarovning ma’lumot berishicha, tug‘ruq bo‘limining bir blogi sobiq bosh shifokor G‘anisher Umrzoqov davrida tadbirkorlarga berib yuborilgan.
“Daryo” muxbiri bilan suhbatlashgan yosh hokim Sabrina Tursunovaning aytishicha, muammo viloyat rahbari Zoir Mirzayevga ham aytilgan.
“Zoir Toirovich mas’ullarni chaqirib mazkur muammoni tez orada batafsil o‘rganib, yechimini topish topshirig‘ini berdi”, — deydi Sabrina Tursunova.
Eslatib o‘tamiz, avvalroq viloyatda 10 kun muddatga hokimlik vazifasini bajarishga kirishgan yosh hokimlar haqida xabar berilib, Dehqonobodni boshqarayotgan Adham Qulmamatovning tumandagi zavodga borib, qancha yoshni ishli qilgani bilan qiziqqani, Yakkabog‘ hokimi vazifasini bajaruvchi Setora Ergasheva esa unga murojaat qilgan fuqaro bilan tortishib qolib, “opa, siz menga ‘ponyatka’ bermang”, degani haqida xabar berilgandi.
Izoh (0)