UFC prezidenti Deyna Uayt 15-yanvar kuni bo‘lib o‘tgan UAE Warriors musobaqasida Habib Nurmagomedov bilan uchrashgandi. Tomonlar alohida xonada muzokaralar o‘tkazgan, unda rossiyalik yakkakurashchining kelajagi borasida gap borgani aytilgandi.
Keyin ular VIP lojaga qaytgan va suhbatda davom etgan. Ana shu suhbatdan parcha internetda paydo bo‘ldi.
“Konor va Porye o‘rtasidagi jang translyatsiyasi sening Makgregorga qarshi bahsingdan ko‘ra ko‘proq sotilyapti. Shunchaki tasavvur qil, Konor va sen o‘sha la’nati ikkinchi jangda nimalar qilib yuborishing mumkin. Men shunchaki aytyapman, shunchaki”, — degan Uayt.
Avvalroq UFC prezidenti suhbat tafsilotlarini ochiqlagan, unda rossiyalik sportchi UFC 257 musobaqasidagi asosiy janglarda uni birorta sportchi qoyil qoldira olsa, o‘z qarorini o‘ylab ko‘rishi haqida aytgani ma’lum bo‘lgandi.
2020-yilning 24-oktabr kuni Abu-Dabidagi (BAA) “Jangchilar oroli”da bo‘lib o‘tgan musobaqa asosiy jangida Habib Nurmagomedov va Jastin Getji o‘zaro to‘qnash keldi. Unda rossiyalik sportchi ikkinchi raundda raqibiga bo‘g‘ish usulini qo‘llab g‘alaba qozondi. Jangdan keyin Habib faoliyatini yakunlashini ma’lum qildi.
Eslatib o‘tamiz, Toshkent vaqti bilan 24-yanvar tongida BAAdagi “Jangchilar oroli”da Konor Makgregor va Dastin Porye o‘rtasida jang bo‘lib o‘tadi.
Mavzuga doir:
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)