UFC президенти Дэйна Уайт 15 январь куни бўлиб ўтган UAE Warriors мусобақасида Ҳабиб Нурмагомедов билан учрашганди. Томонлар алоҳида хонада музокаралар ўтказган, унда россиялик яккакурашчининг келажаги борасида гап боргани айтилганди.
Кейин улар VIP ложага қайтган ва суҳбатда давом этган. Ана шу суҳбатдан парча интернетда пайдо бўлди.
«Конор ва Порье ўртасидаги жанг трансляцияси сенинг Макгрегорга қарши баҳсингдан кўра кўпроқ сотиляпти. Шунчаки тасаввур қил, Конор ва сен ўша лаънати иккинчи жангда нималар қилиб юборишинг мумкин. Мен шунчаки айтяпман, шунчаки», — деган Уайт.
Аввалроқ UFC президенти суҳбат тафсилотларини очиқлаган, унда россиялик спортчи UFC 257 мусобақасидаги асосий жангларда уни бирорта спортчи қойил қолдира олса, ўз қарорини ўйлаб кўриши ҳақида айтгани маълум бўлганди.
2020 йилнинг 24 октябрь куни Абу-Дабидаги (БАА) «Жангчилар ороли»да бўлиб ўтган мусобақа асосий жангида Ҳабиб Нурмагомедов ва Жастин Гэтжи ўзаро тўқнаш келди. Унда россиялик спортчи иккинчи раундда рақибига бўғиш усулини қўллаб ғалаба қозонди. Жангдан кейин Ҳабиб фаолиятини якунлашини маълум қилди.
Эслатиб ўтамиз, Тошкент вақти билан 24 январь тонгида БААдаги «Жангчилар ороли»да Конор Макгрегор ва Дастин Порье ўртасида жанг бўлиб ўтади.
Мавзуга доир:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)