Krishtianu Ronalduning hashamatli saroylari, qimmatbaho mashinalari, shaxsiy samolyot va biznes imperiyasi haqida

Krishtianu Ronaldu – ushbu futbolchining shaxsiyati, bolaligi, faoliyati hamda sanog‘i yo‘q sovrinlari haqida istalgancha, qog‘oz va qalam yetganicha yozish mumkin. Ronaldu bugungi kunda o‘zidagi bor narsalarning barchasiga tinimsiz va mashaqqatli mehnati orqali erishgani hech kimga sir emas. Bamisoli temirdek mashq qiladigan Roni, dam olish va katta xaridlarni amalga oshirish borasida ham istalgan insonga dars berishi mumkin. Sezib ulgurganingizdek, quyida Krishtianuning hashamatli hayoti haqida hikoya qilamiz.

Uylari

“Real”dan “Yuventus”ga o‘tgan Ronaldu Turin shahrining qoq markazida joylashgan zamonaviy va hashamatli saroyga joylashgan. U yerga faqat shaxsiy yo‘l orqali borish mumkin.

Uy ko‘p sonli daraxtlar tufayli ko‘zdan yashiringan, ammo shu bilan birga imoratdan shaharning go‘zal manzarasini ko‘rish mumkin. Portugaliyalikka hozirgi uyi Madriddagisiga o‘xshashligi sabab yoqqan. Undan 8 yotoqxona, 4 ta hammom va ulkan derazali qator boshqa xonalar o‘rin olgan. Hujumchi zamonaviy arxitektura va dizaynerlik mebellarini xush ko‘radi.

Shuningdek, futbol yulduzining uyida cho‘milish havzasi va sport zali mavjud. Qasr yonida ulkan bog‘ ham bor, unda Krishtianu farzandlari bilan vaqtini chog‘ o‘tkazadi. Ma’lumotlarga ko‘ra, portugaliyalik Turinga o‘zi bilan birga oshpaz, diyetolog va fizioterapevtni ham olib kelgan. Hududga ikkita kirish eshiklari mavjud bo‘lib, ularning har biri jiddiy qo‘riqlanadi.

Ronalduning o‘zi tug‘ilib o‘sgan Madeyrada uyi bor. Ma’lumotlarga qaraganda, forvard Ispaniyada ham ko‘chmas mulkka egalik qiladi.

Mashinalari

Avtomobillar borasida ham Ronalduga teng keladigani bo‘lmasa kerak. Bugungi kelib uning garajidan 20 dan ortiq avtomashina o‘rin olgan, ularni joylashtirish esa shunchaki oson ish emas. Krishtianuning garajidan McLaren Senna, Bugatti Voiture Noire, Rolls-Royce Phantom, Bugatti Centodieci, Ferrari 599 GTB Fiorano va bir qator boshqa qimmatbaho mashinalar o‘rin olgan.

Ronalduning mashinalari, ularning narxlari hamda afzalliklari haqida batafsil bu yerda o‘qish mumkin:

Bugatti, Ferrari, Lamborghini va Rolls-Royce. Krishtianu Ronalduning garajiga sayohat (foto)

O‘ziga kelganda hech narsani ayamaydigan Ronaldu barcha sharoitlar bilan jihozlangan 50 million yevrolik shaxsiy samolyotga ham egalik qiladi. Samolyot bortida yotoqxona, oshxona, telefon va internet bor. “Temir qush” o‘z ichiga 18 nafar yo‘lovchini sig‘dira oladi.

Shaxsiy hayoti

Krishtianu Ronalduning hayotida juda ko‘plab ayollar bo‘lgan, biroq hozir ular haqida ortiqcha gapirishdan ma’no yo‘q. Ronaldu 2016-yilda Jorjina Rodriges bilan munosabat qurgan va juftlik hamon birga. Ronaldu Jorjina dunyoga keltirgan qizaloqdan tashqari yana bir qiz va ikki o‘g‘ilga otalik qiladi. Futbolchining ijtimoiy tarmoqdagi sahifalarida tez-tez oilaviy suratlarni ko‘rish mumkin.

Do‘stlari

Krishtianu Ronaldu asosiy vaqtini ko‘pincha oilasi davrasida o‘tkazadi, sayohat qiladi va mashinalarini boshqaradi. Biroq u hamma narsaga ulgurgani kabi, do‘stlashishga ham vaqt topadi. Uning mashhur do‘stlari orasida, yengil atletikachi Useyn Bolt, bokschi Floyd Mezvezer, MMA’chilar Habib Nurmagomedov va Konor Makgregorni ko‘rish mumkin. Shuningdek, uning sobiq jamoasi “Real”dan faqatgina Marselo bilan aloqani saqlab qolgani aytiladi.

Futboldan tashqari qiziqishlar

Futbolchining bo‘sh vaqti deyarli bo‘lmasa-da, bunday vaqtlarda u aslo zerikib qolmaydi. Boisi Ronaldu o‘z biznes imperiyasiga asos solgan: mehmonxona, sport zali, parfyumeriya, ichki kiyimlar va boshqalar. Shuningdek, u reklama roliklarida suratga tushadi, mashhur brendlar bilan imzolangan shartnomalar esa unga ulkan daromad keltiradi. Bundan tashqari Ronaldu Instagram tarmog‘ida eng ko‘p obunachiga ega inson hisoblanadi – 255 million. Shunday ekan, uning sahifasida reklama joylashtirish qanchaga tushishini o‘zingiz o‘ylab ko‘ravering. Forbes jurnali Ronalduning o‘tgan 2020-yildagi daromadini 117 million dollarga baholagan. Shundan 31 millioni uning “Yuventus”dagi bir yillik maoshi hisoblanadi. Shuningdek, Ronaldu muntazam ravishda xayriya ishlarida faol qatnashib keladi.