O‘qituvchilarga vaqtinchalik to‘xtatilgan ustamalar 1-yanvardan o‘rnatilgan tartibda to‘lab beriladi. Bu haqda Xalq ta’limi vazirligi matbuot xizmati xabar berdi.
Vazirlar Mahkamasining “2020-yil uchun O‘zbekiston Respublikasi davlat budjetining barqarorligini ta’minlash va xarajatlarni maqbullashtirish bo‘yicha qo‘shimcha chora-tadbirlar to‘g‘risida”gi 232-son va 2020-yil 21-sentabrdagi qarorlariga asosan budjet tashkilotlarida ishlaydigan xodimlarga 1-yanvarga qadar moddiy rag‘batlantirish maxsus jamg‘armasi hamda direktor jamg‘armasi mablag‘lari hisobidan to‘lovlar hisoblanishi to‘xtatib turilgan edi.
Tibbiyot, tibbiy-ijtimoiy muassasalar, mehribonlik uylari hamda mehnatga haq to‘lashning 1-3 razryadlari qo‘llaniladigan xodimlar bundan mustasno bo‘lgan.
“Bugungi kunda ayrim hududlarda direktor jamg‘armasi mablag‘lari hisobidan to‘lanishi lozim bo‘lgan ustamalar hisoblanmayotgani yuzasidan noroziliklar yuzaga kelmoqda. 2021-yilning 1-yanvaridan boshlab mazkur ustamalar to‘lanmasligi yuzasidan hech qanday ko‘rsatmalar berilmaganini ma’lum qilamiz”, deyiladi XTV xabarida.
Qayd etilishicha, vaqtinchalik to‘xtatilgan ustamalar ishchi guruhlarning 2020-yil 1-iyulga qadar qabul qilgan qarori va direktorning buyrug‘i asosida 2021-yil 1-yanvardan boshlab o‘rnatilgan tartibda to‘lab beriladi.
Xalq ta’limi vazirligi hududiy xalq ta’limi bo‘linmalaridan pedagog xodimlarning oylik ish haqiga ustamalar to‘lanishini 2021-yil 1-yanvardan boshlab amalga oshirishni, ustamalarni to‘lashda sustkashlikka yo‘l qo‘yayotgan tegishli mas’ullarga nisbatan intizomiy chora ko‘rilishini qat’iy nazoratga olishni so‘ragan.
Ma’lumot uchun, budjet tashkilotlarida ishlaydigan xodimlarni moddiy rag‘batlantirish Moliya vazirligining 1995-yilda qabul qilgan nizomi bilan tartibga solinadi.
Avvalroq o‘qituvchi boshqa tumanga ishlash uchun borganiga 50 foiz, boshqa viloyatga borganiga esa 100 foiz qo‘shimcha haq to‘lanishi ma’lum qilingandi.
Izoh (0)