“Hokimning tashabbusi yorug‘ kun paytida momaqaldiroq urgandek bo‘ldi” – mahalla raisi Jahongir Ortiqxo‘jayevning MFYlarga nisbatan e’tibori haqida

Xalq deputatlari Toshkent shahar Kengashining 19-yanvar kuni bo‘lib o‘tgan 31-sessiyasida Toshkent shahar hokimi Jahongir Ortiqxo‘jayev poytaxtdagi mavjud muammolarni bartaraf etish uchun har bir mahalla fuqarolari yig‘iniga 50 million so‘mdan mablag‘ ajratilishi, namunaviy deb topilgan 50 ta eng yaxshi mahalla raisining har biriga homiylar tomonidan 50 ta Spark avtomobili berilishini ma’lum qilgandi.

2021-yilning 21-yanvar kuni Toshkent shahar hokimligida o‘tkazilgan Xalq deputatlari Toshkent shahar Kengashining 31-sessiyasi natijalari hamda joriy yil rejalariga bag‘ishlangan matbuot anjumanidan so‘ng Mirzo Ulug‘bek tumanidagi “Katta Qorasuv” MFY raisi, xalq deputatlari Toshkent shahar Kengashi deputati Naima Jabborova jurnalist va blogerlarga intervyu berdi, deya xabar qilmoqda “Daryo” muxbiri.

U poytaxt hokimining tashabbusi to‘g‘risida munosabat bildirarkan, “hech qachon mahalla raisiga bitta qalam ham mukofot sifatida berilmagan”ligini alohida qayd etdi.

“Menimcha, faol ishlagan MFYlarga avtomashina berish fikri shahar hokimimizda o‘zidan o‘zi tug‘ilmagan. Davlatimiz rahbarining Oliy Majlisga qilgan Murojaatnomasi hamda viloyatlarga bo‘lgan tashriflari davomida mahalla va uning vakillari haqida gapirgani, iliq munosabatidan ta’sirlangan holda shunday tashabbus bilan chiqqan, deb o‘ylayman. Bu orqali mahalla xodimlari yanada faol ishlashi shubhasiz.

Bilasizmi, shahar hokimimizning tashabbusi yorug‘ kun paytida momaqaldiroq urgandek bo‘ldi. Nimaga? Chunki hech kim bu narsani kutmagandi. Hech qachon mahalla raisiga bitta qalam ham mukofot sifatida berilmagan. Prezidentimiz sharofati bilan mahallalarga ahamiyat qaratilyapti. Toshkent shahar hokimi mahalla raislarini uyg‘otish uchun shu tashabbusni ilgari surmoqda, nazarimda.

Shu o‘rinda fuqarolik fikrimni aytib o‘tmoqchiman: mazkur mashinalar xalqiga, mahallasiga, fuqarolariga fidokorona ishlayotgan MFY vakillariga beriladi. Misol uchun, meni 350 nafar fuqaro rais etib sayladi. Men ularning har birining ovozi, ishonchini oqlashim kerak. Mahallada shunaqa sharoit qilib qo‘yish kerakki, odamlar shu hududda yashayotganidan rozi bo‘lishi, boshqa mahallaga ko‘chib ketishni xohlamasligi lozim. Agar men noto‘g‘ri ishlasam, odamlarda menga va davlat rahbariga nisbatan norozichilik kayfiyati uyg‘onadi. Shunaqa bo‘lmasligi uchun ham Prezidentimiz mamlakat miqyosida qanday islohotlar amalga oshirayotgan bo‘lsa, hech yo‘q, ularning ishini o‘ndan birini mahallada qilishim kerak. Qayerdadir nimadir bo‘ladigan bo‘lsa, birinchi men yugurib borishim lozim. O‘shanda aholining roziligini olaman”, — dedi Naima Jabborova.