O‘zbekistonda budjet xodimlariga 1-yanvardan moddiy rag‘batlantirish puli to‘lanishi davom etadi

O‘zbekistonda 2021-yil 1-yanvardan boshlab budjet tashkilotlarida ishlaydigan xodimlarga moddiy rag‘batlantirish maxsus jamg‘armasi, OTMlarning moddiy rag‘batlantirish jamg‘armasi hamda direktor jamg‘armasi mablag‘lari hisobidan to‘lovlar hisoblanishi davom etadi, deb xabar bermoqda “Kun.uz”.

Qayd etilishicha, 2020-yil davlat budjeti barqarorligini ta’minlash va xarajatlarni maqbullashtirish bo‘yicha hukumat qarori bilan 2021-yil 1-yanvarga qadar moddiy rag‘batlantirish to‘lovlarini hisoblash to‘xtatilgandi. Tibbiyot, tibbiy-ijtimoiy muassasalar, mehribonlik uylaridan hamda mehnatga haq to‘lashning 1—3-razryadlari qo‘llaniladigan xodimlar bundan mustasno bo‘lgan.

Nashrning hukumatdagi manbasining bildirishicha, budjet tashkilotlarida ishlaydigan xodimlarga moddiy rag‘batlantirish maxsus jamg‘armasi, OTMlarning moddiy rag‘batlantirish jamg‘armasi hamda direktor jamg‘armasi mablag‘lari hisobidan to‘lovlar hisoblanishi to‘xtatib turilishiga oid hukumat qarori loyihasi tayyorlanmagan.

“To‘lovlar hisoblanishi to‘xtatilgandi, u dastlab oktabr oyigacha, keyin yil so‘ngiga qadar amal qildi. Ayni paytda muddatni yana uzaytirish bo‘yicha biror harakat yo‘q. Demak, hukumatning amaldagi qarori bo‘yicha to‘lovlar hisoblanishini to‘xtatib turish 1-yanvardan keyin bekor qilinadi”, — deydi manba.

Ma’lumot uchun, budjet tashkilotlarida ishlaydigan xodimlarni moddiy rag‘batlantirish Moliya vazirligining 1995-yilda qabul qilgan nizomi bilan tartibga solinadi.

Avvalroq O‘zbekiston Hisob palatasi budjet tashkilotlari xodimlarining moddiy rag‘batlantirish to‘lovlari qisqartirilishiga qarshi chiqqan edi.